मङ्गन, 10 सेप्टेम्बर (हि.स.)। सिक्किम सरकारको खेलकुद तथा युवा मामिला विभागद्वारा आयोजित विद्यालय खेलकुद २०२६ अन्तर्गत मङ्गन खण्डस्तरीय प्रतियोगिता बिहीबार मङ्गन पब्लिक ग्राउन्डमा सम्पन्न भएको छ।
प्रतियोगितामा मङ्गन खण्डका आठ विद्यालयका १३० जना विद्यार्थी खेलाडीले १७ वर्षमुनिका छात्र तथा छात्रा एथलेटिक्स विधामा सहभागिता जनाए। प्रतियोगितामा १००, ४००, ८०० र १५०० मिटर दौड, शटपुट तथा लङ्ग जम्पलगायतका खेल समावेश थिए।
कार्यक्रममा रिङ्हिम-नामपतमका पञ्चायत अध्यक्ष शेराब भोटिया, पञ्चायत सदस्य मोती तामाङ, खेलकुद विभागकी अतिरिक्त निर्देशक जेनिम लेप्चा, शारीरिक शिक्षा शिक्षक, सहभागी विद्यालयका शिक्षक, विभागीय अधिकारी तथा कर्मचारी र स्थानीयवासीको उपस्थिति रहेको थियो।
प्रतियोगितापछि २० जना खेलाडीलाई जिल्लास्तरीय प्रतियोगिताका लागि छनोट गरिएको छ। मङ्गन, जङ्गु, चुङ्थाङ र काबी खण्डबाट छनोट भएका खेलाडीबीच आगामी २१ सेप्टेम्बरमा मङ्गन पब्लिक ग्राउन्डमा जिल्लास्तरीय प्रतियोगिता हुनेछ। त्यसपछि उत्कृष्ट खेलाडीहरूले राज्यस्तरीय प्रतियोगितामा सहभागिता जनाउनेछन्।
मङ्गन जिल्लाका विभिन्न खण्डमा ७ देखि १२ सेप्टेम्बरसम्म सञ्चालन भइरहेको विद्यालय खेलकुद २०२६ को उद्देश्य विद्यार्थीमा लुकेको खेल प्रतिभा पहिचान तथा विकास गर्नुका साथै शारीरिक तन्दुरुस्ती, अनुशासन, सहकार्य र स्वस्थ प्रतिस्पर्धाको भावना प्रवर्द्धन गर्नु रहेको छ।
हिन्दुस्थान समाचार / बिशाल
10 Sep 2026
