नयाँ दिल्ली, १२ सेप्टेम्बर (हि.स.)। राष्ट्रिय शिल्प संग्रहालयमा आयोजित ‘ब्रिक्स बजार’ मा भारत र इरानबीचको सांस्कृतिक सम्बन्धको झलक देखिएको छ। इरानका राष्ट्रपति मसुद पेजेश्कियनकी छोरी जहरा पेजेश्कियन आफ्ना पति हसन मजीदीसँग इरानको प्रदर्शनी कक्षमा पुगेकी थिइन्।
यस अवसरमा केन्द्रिय महिला तथा बाल विकासमन्त्री अन्नपूर्णा देवीले जहरा पेजेश्कियनको स्वागत गर्दै उनलाई ब्रिक्स बजारको भ्रमण गराएकी थिइन्। उनले ब्रिक्सका सदस्य तथा साझेदार राष्ट्रहरूले प्रदर्शनमा राखेका कला, हस्तकला, परम्परागत सामग्री तथा सांस्कृतिक सम्पदाको अवलोकन गरिन्। उनले त्यहाँ उपस्थित कारीगर तथा प्रतिनिधिहरूसँग कुराकानी गर्दै उनीहरूले प्रस्तुत गरेका कला तथा हस्तकलाबारे जानकारी लिइन्।
दिल्लीस्थित शिल्प संग्रहालयमा आयोजित यस प्रदर्शनीमा १८ देशका ४० भन्दा बढी कारीगर, डिजाइनर तथा सिर्जनात्मक क्षेत्रसँग सम्बन्धित कम्पनीहरूले आफ्नो परम्परागत कला र हस्तकलाको प्रदर्शन गरिरहेका छन्। प्रदर्शनी १५ सेप्टेम्बरसम्म सञ्चालन हुनेछ। ब्रिक्स सम्मेलनका क्रममा विभिन्न विदेशी पाहुना तथा उनीहरूका परिवारका सदस्यहरूले समेत प्रदर्शनीको भ्रमण गर्ने अपेक्षा गरिएको छ।
ब्रिक्स बजारमा चीनको सुझोउ कढाई, इन्डोनेसियाको परम्परागत बुनाई, नाइजेरियाको काठ तथा लौकाबाट निर्मित कलाकृति र दक्षिण अफ्रिकाको जुलु छाला कलालगायत विभिन्न देशका मौलिक कला, हस्तकला, हातले बुनेका कपडा, वस्त्र तथा कलाकृति प्रदर्शनमा राखिएका छन्। यहाँ आउने विदेशी प्रतिनिधिहरूले कारीगरहरूले आफ्ना कला सिर्जना गरिरहेको प्रत्यक्ष हेर्नसमेत पाउनेछन्। यसका अतिरिक्त विभिन्न सांस्कृतिक कार्यक्रम पनि आयोजना भइरहेका छन्।
भारतका तर्फबाट पनि चार कारीगरले आफ्नो परम्परागत कलाको प्रदर्शन गरिरहेका छन्। रियाज अहमदले कश्मीरी पेपर मेश, मोहम्मद बिलाल खत्रीले छापाचित्र कला, करण सिंहले टेराकोटा कला तथा शादाब अहमदले लाखका चुरा बनाउने कला प्रस्तुत गरिरहेका छन्।
ब्रिक्सका सदस्य तथा साझेदार राष्ट्रहरूका लागि राखिएका प्रदर्शनी कक्षबाहेक आयोजक भारतले देशको सांस्कृतिक विविधता प्रदर्शन गर्न विभिन्न राज्यका विशेष कुनासमेत तयार गरेको छ। प्रदर्शनीस्थलमा जम्मू-कश्मीरको झोपडी, राजस्थानको आँगन, गुजरातको झोपडी, ओडिशाको आँगन, बंगालको झोपडी तथा बिहारको आँगन तयार गरिएको छ।
हिन्दुस्थान समाचार / बिशाल
