ढाका, १३ सेप्टेम्बर (हि.स.)। बङ्गलादेशको चापाइनवाबगञ्ज सदर उपजिल्लास्थित पद्मा नदीमा डुङ्गा पल्टिँदा डुबिरहेका १० जनालाई भारतीय सीमा सुरक्षा बल (बीएसएफ) ले उद्धार गरेको छ। यी सबै जना भारतीय क्षेत्रमा सुरक्षित अवस्थामा छन्। बीएसएफले यसबारे बङ्गलादेशलाई आधिकारिक रूपमा जानकारी दिएको छ। बङ्गलादेशले आफ्ना नागरिकलाई फिर्ता ल्याउने प्रक्रिया शुरु गरेको छ।

ढाका ट्रिब्युन अखबारको रिपोर्टअनुसार, शनिबार दिउँसो पद्मा नदीमा १२ जना यात्रु सवार डुङ्गा पल्टिएपछि भारतीय सीमा सुरक्षा बल (बीएसएफ) का जवानहरूले १० जना बङ्गलादेशी नागरिकलाई उद्धार गरेका हुन्। एक जना यात्रु पौडिएर बङ्गलादेशी क्षेत्रमा फर्किन सफल भएका छन् भने अर्का एक जना अझै बेपत्ता छन्।

पुलिस र स्थानीय बासिन्दाका अनुसार, १२ जना यात्रु सवार डुङ्गा साँझ करिब ५ बजी बखेराली घाटबाट जोहुरपुरटेकतर्फ प्रस्थान गरेको थियो। यात्रा शुरु भएको करिब २० मिनेटपछि तीव्र हावा र नदीको तेज छालका कारण डुङ्गा पल्टिएको थियो। खण्डुआ बीएसएफ शिविरका गस्तीमा रहेका जवानहरूले नदीबाट १० जना यात्रुलाई उद्धार गरी भारतीय क्षेत्रमा ल्याए।

वसीम नाम गरेका २५ वर्षीय एक यात्रु पौडिएर बङ्गलादेशको किनारमा पुग्न सफल भएका छन् भने मुस्तफा नाम गरेका एक व्यक्ति अझै बेपत्ता छन्। सूचना पाएपछि पुलिस र अग्नि सेवाका जवान घटनास्थलमा पुगेका थिए।

यसैबीच, बीएसएफले १० जना बङ्गलादेशी नागरिकलाई उद्धार गरिएकोबारे सीमा गार्ड बङ्गलादेश (बीजीबी) लाई आधिकारिक रूपमा जानकारी गराएको छ। ५३ बीजीबी बटालियनका कमान्डिङ अफिसर लेफ्टिनेन्ट कर्नेल काजी मुस्तफिजुर रहमानले भने, “उद्धार गरिएका १० जना बङ्गलादेशीलाई बङ्गलादेश फिर्ता ल्याउने प्रक्रिया चलिरहेको छ। बेपत्ता मुस्तफाको खोजी गर्ने प्रयास पनि जारी छ।”

हिन्दुस्थान समाचार / बिशाल