गान्तोक, 28 सेप्टेम्बर (हि.स.)। पूर्वोत्तर क्षेत्रीय मुए थाई च्याम्पियनसिप २०२६ मा सिक्किम मुए थाई संघका खेलाडीहरूले उत्कृष्ट प्रदर्शन गर्दै कुल ११ पदक जितेर राज्यको नाम रोशन गरेका छन्। मिजोरममा सम्पन्न प्रतियोगितामा सिक्किमले ३ स्वर्ण, ३ रजत र ५ कांस्य पदक जित्दै ऐतिहासिक उपलब्धि हासिल गरेको हो।
यो सफलता सिक्किमका प्रतिभाशाली खेलाडीहरूको समर्पण, अनुशासन, दृढता र प्रतिस्पर्धी भावनाको प्रतिफल हुनुका साथै प्रशिक्षक तथा टोली पदाधिकारीहरूको अथक प्रयासको परिणाम रहेको सिक्किम मुए थाई संघले बताएको छ।
भूमिका राई (५२ केजी), नेहा गुरुङ (६५ केजी) र सावन सुब्बा (५७ केजी) आ-आफ्नो वर्गमा स्वर्ण पदक जितेका छन्। यसरी नै प्रियान्शु प्रधान (५७ केजी), तान्चोक सुब्बा (६३.५ केजी) र सन्चा मान लिम्बू (४८ केजी) ले रजत पदक जितेका छन्। यसैगरी, नरबहादुर छेत्री (४५ केजी), ड्यानियल गुरुङ (५४ केजी), प्रगन राई (६२ केजी), छुतेन किन्जाङ लेप्चा (५२ केजी) र ऐता राज राई (६५ केजी) ले कांस्य पदक जितेका छन्।
संघले मुख्य प्रशिक्षक भीम दल राई, सहायक प्रशिक्षक रोशन राई तथा टोलीका सबै पदाधिकारीहरूको समर्पण, कडा मेहनत र महत्वपूर्ण योगदानप्रति विशेष आभार व्यक्त गरेको छ। उनीहरूको प्राविधिक मार्गदर्शन र निरन्तर हौसलाले खेलाडीहरूको सफलतामा महत्वपूर्ण भूमिका खेलेको संघले जनाएको छ।
सिक्किम मुए थाई संघले सिक्किमका मुख्यमन्त्री तथा खेलकुद विभाग, सिक्किम सरकारप्रति हार्दिक धन्यवाद व्यक्त गरेको छ। खेलकुदको प्रवर्द्धन र युवा प्रतिभाको विकासमा सरकारबाट प्राप्त निरन्तर सहयोग र प्रोत्साहनले खेलाडीहरूलाई थप प्रेरणा प्रदान गरेको संघको भनाइ छ।
हिन्दुस्थान समाचार / बिशाल
