न्युयोर्क, 0८ सेप्टेम्बर (हि.स.)। काजाकिस्तानकी एलेना राइबाकिनाले सोमबार पूर्व च्याम्पियन नाओमी ओसाकालाई सोझो सेटमा पराजित गर्दै यूएस ओपनको क्वार्टरफाइनलमा स्थान बनाएकी छन्। दोस्रो वरीयताकी राइबाकिनाले ओसाकालाई ६-१, ६-४ ले हराइन्। अब उनले क्वार्टरफाइनलमा चीनकी झेङ छिनवेनको सामना गर्नेछिन्। सेमिफाइनलमा प्रवेश गर्न सके राइबाकिना विश्व नम्बर-१ बन्नेछिन्।

राइबाकिनाले कोर्टमा दिएको अन्तर्वार्तामा भनिन्, “निश्चय नै म नम्बर-१ बन्न चाहन्छु। यस्तो चाहना नहुने व्यक्ति मलाई थाहा छैन। यो निश्चित रूपमा मेरा लक्ष्यहरूमध्ये एक हो। म हरेक खेललाई समान रूपमा लिने प्रयास गर्छु, आफ्नो उत्कृष्ट प्रदर्शन गर्ने र अन्तिमसम्म संघर्ष गर्ने प्रयास गर्छु। अब आगामी खेलमा के हुन्छ, हेरौँ।”

झेङ छिनवेनले आठौँ वरीयताकी इगा श्वियातेकलाई ७-५, ६-३ ले पराजित गर्दै अन्तिम-८ मा प्रवेश गरेकी छन्। चीनको २०२४ की ओलम्पिक च्याम्पियन झेङ लगातार दोस्रो खेलमा शुरुवाती पाँच गेम गुमाएपछि पुनरागमन गर्न सफल भइन्। सन् २०२१ मा एमा राडुकानुले च्याम्पियन बनेपछि यूएस ओपनको क्वार्टरफाइनलमा पुग्ने उनी पहिलो क्वालिफायर बनेकी छन्।

यसअघि झेङले म्याडिसन कीजविरुद्ध तेस्रो सेटमा ०-५ ले पछि परेपछि लगातार सात गेम १-६, ७-६, ७-५ ले जितेकी थिइन्। श्वियातेकविरुद्धको खेलमा पनि उनले शुरुवाती पाँच गेम गुमाएकी थिइन्।

झेङले भनिन्, “मलाई लाग्छ, हिजो ०-५ बाट गरेको पुनरागमन भाग्यका कारण भएको थिएन। म यति मात्र भन्न सक्छु।”

राइबाकिनाले यस वर्ष अस्ट्रेलियन ओपन जित्दै आफ्नो दोस्रो ग्रान्ड स्लाम उपाधि हात पारेकी थिइन्। विश्व नम्बर-२ उनको करियरकै उच्च वरीयता हो। बुधबार पराजित भए पनि उनीसँग नम्बर-१ बन्ने अवसर रहनेछ।

ओसाकाविरुद्धको खेल केवल एक घण्टा छ मिनेट चलेको थियो। राइबाकिनाले एस प्रहार गर्दै खेल समाप्त गरिन्। उनी अहिले महिला टेनिस संघ (डब्ल्यूटीए) को सम्पूर्ण टुरमा सबैभन्दा धेरै एस प्रहार गर्ने खेलाडीमध्ये शीर्ष स्थानमा छिन्। आफ्ना चार ग्रान्ड स्लाम उपाधिमध्ये दुई यूएस ओपनमा जितेकी ओसाका खेलका क्रममा खुट्टा वा गोलीगाँठोको समस्याबाट प्रभावित देखिएकी थिइन्।

गफ पनि तीन वर्षपछि क्वार्टरफाइनलमा

चौथो वरीयताकी कोको गफले १४औँ वरीयताकी इभा जोविचलाई ६-१, ६-४ ले पराजित गर्दै तीन वर्षपछि यूएस ओपनको क्वार्टरफाइनलमा स्थान बनाएकी छन्। गफले सन् २०२३ मा यही प्रतियोगितामा आफ्नो पहिलो ग्रान्ड स्लाम उपाधि जितेकी थिइन्। त्यसपछि उनी पछिल्ला दुई वर्षमा चौथो चरणभन्दा अगाडि बढ्न सकेकी थिइनन्।

अब गफले फ्रेन्च ओपन च्याम्पियन तथा पाँचौँ वरीयताकी मिर्रा आन्द्रीवासँग प्रतिस्पर्धा गर्नेछिन्। आन्द्रीवाले २४औँ वरीयताकी अनास्तासिया पोटापोवालाई ५-७, ६-४, ६-३ ले पराजित गरिन्। खेलको अन्तिम गेममा पोटापोभाको घुँडामा चोट लागेपछि आन्द्रीवाले उनलाई सहयोगसमेत गरेकी थिइन्।

हिन्दुस्थान समाचार / बिशाल