कोलकाता, १ अक्टोबर (हि.स.)। हावडामा मंगलबार राति गोली चल्दा सनसनी फैलियो। राति लगभग 9:३० बजे संध्या बजारस्थित बनो बिहारी बोस लेनमा मोटरसाइकलमा आएका दुई हमलावरले ५५ वर्षीय सुरेश यादवलाई लक्षित गर्दै अन्धाधुन्ध गोली प्रहार गरे। गम्भीर घाइते यादवलाई तुरुन्त अस्पताल लगियो, जहाँ चिकित्सकहरूले उनलाई मृत घोषणा गरे।
हावडा पुलिस आयुक्त प्रवीण त्रिपाठीले बुधबार बिहान जानकारी दिँदै भने, बिहारको गोपालगंजका बासिन्दा सुरेश यादव दुई दिनअघि मात्रै हावडा आएका थिए। उनीमाथि धेरै आपराधिक मुद्दा दर्ता भएका थिए। यद्यपि आफ्नै क्षेत्रमा उनी व्यवसायीका रूपमा परिचित थिए। उनले गोपालगंज जेलमा करिब आठ वर्षको सजाय पनि काटेका थिए। पुलिसका अनुसार यादवको बिहारमै आपराधिक दुश्मनी रहेको थियो र दुई वर्षअघि गोपालगंजमै उनीमाथि गोली प्रहार भएको थियो, जसमा उनी बचेका थिए।
घटनापछि क्षेत्रमा ठूलो तनाव फैलिएको छ। हावडा सिटी पुलिसका वरिष्ठ अधिकारीहरू घटनास्थलमा पुगे र त्यहाँबाट महत्त्वपूर्ण सुराग संकलन गरे। प्रारम्भिक अनुसन्धानमा हमलावरहरू योजनाबद्ध ढंगले मोटरसाइकलमा आएका थिए र गोली प्रहार गरेर फरार भएको थाहा लागेको छ।
पुलिसले वरपरका सीसीटीभी फुटेज कब्जामा लिएका छन् र स्थानीय बासिन्दाहरूसँग सोधपुछ भइरहेको छ। अधिकारीहरूको भनाइअनुसार केही महत्त्वपूर्ण प्रमाण भेटिएका छन् र चाँडै नै आरोपितलाई पक्राउ गरिनेछ।
दशैं–दुर्गा पूजाको भीडभाडबीच सार्वजनिक स्थलमा भएको यस हत्याले सम्पूर्ण क्षेत्रमा त्रास फैलिएको छ।
---------------
हिन्दुस्थान समाचार / भवानी थामी
01 Oct 2025
