नयाँ दिल्ली, १ अक्टोबर (हि.स.)। प्रधानमन्त्री नरेन्द्र मोदीले राष्ट्रिय स्वयंसेवक संघ (आरएसएस) को शताब्दी वर्षगाँठमा बुधबार आयोजित विशेष समारोहलाई सम्बोधन गर्दै संघको १०० वर्षको यात्रालाई त्याग, निःस्वार्थ सेवा र राष्ट्र निर्माणको अद्भुत उदाहरणको रूपमा वर्णन गरे। उनले भने, विजयादशमी पर्व असत्यमाथि सत्यको विजयको प्रतीक हो र यही दिन १९२५ मा डा. केशव बलिराम हेडगेवारले संघको स्थापना गरेका थिए।

प्रधानमन्त्री मोदीले भने, “संघको स्थापना कुनै संयोग थिएन, यो भारतीय संस्कृति र परम्पराको पुनरुत्थानको संगठित प्रयास थियो। यो राष्ट्र चेतनाको पुण्य अवतार थियो।” उनले यस अवसरमा देशवासीलाई नवरात्रि र विजयादशमीको शुभकामना दिँदै भने, यो पीढी भाग्यमानी छ, जसले संघको शताब्दी वर्ष जस्ता महान अवसरको साक्षी बन्ने अवसर पाएको छ।

यस ऐतिहासिक अवसरमा भारत सरकारले १०० रुपियाँको स्मारक सिक्का र विशेष डाक टिकट जारी गरेको छ। सिक्काको एकपट्टि राष्ट्रिय चिन्ह र अर्कोपट्टि भारत माताको भव्य छवि अंकित गरिएको छ। प्रधानमन्त्रीले भने, स्वतन्त्र भारतको इतिहासमा पहिलो पटक मुद्रामा भारत माताको तस्वीर अंकित गरिएको छ। डाक टिकटमा १९६३ को क्षण देखाइएको छ, जब संघका स्वयंसेवक पहिलो पटक गणतन्त्र दिवस परेडमा सहभागी भएका थिए।

प्रधानमन्त्री मोदीले भने, संघले आफ्ना कार्यकर्ताहरूको अनुशासन र समर्पणको भावबाट समाजका प्रत्येक आयाममा प्रभाव पारेको छ। उनले भने, कृषि, विज्ञान, आदिवासी कल्याण, महिला सशक्तिकरण, समाज सेवा वा श्रमिक हित – संघको धारा हरेक क्षेत्रमा प्रवाहित भएको छ। संघको उद्देश्य राष्ट्र निर्माण हो र यसको कार्यपद्धतिमा नियमित शाखा यसको आधार हो।

उनले सबै स्वयंसेवक र उनका परिवारलाई सम्झँदै भने, लाखौं कार्यकर्ताले राष्ट्र सेवामा आफ्नो जीवन समर्पित गरेका छन्। प्रधानमन्त्रीले परमपूज्य डा. हेडगेवारलाई श्रद्धाञ्जली अर्पित गर्दै भने, उनका विचार र संकल्पले भारतलाई नयाँ युगतर्फ अगाडि बढाएको छ। प्रधानमन्त्रीले भने, संघको शताब्दी वर्षमा हामीले राष्ट्र सेवाको संकल्प अझ बलियो बनाउनुपर्छ। उनले सबै देशवासीलाई समाज र राष्ट्रहितलाई सर्वोपरि राख्दै अघि बढ्न आह्वान गरे।

राष्ट्रिय स्वयंसेवक संघका सरकार्यवाह दत्तात्रेय होसबोलेले यस अवसरमा भने, विजयादशमी संघको यात्रामा विशेष महत्व राख्छ, किनकि यही दिन संगठनको स्थापना भएको थियो। उनले भने, भोलि विजयादशमीमा संघ आफ्नो १०१ औं वर्षमा प्रवेश गर्दैछ र आगामी समय राष्ट्र निर्माणको दिशामा अझ महत्वपूर्ण हुनेछ।

उनले भने, संघको काम प्रतिस्पर्धा वा जवाफ दिनको लागि होइन, समाज र राष्ट्रको सेवाका लागि हो। समाजको प्रत्येक क्षेत्रमा संघका स्वयंसेवक सक्रिय छन् र राष्ट्रभक्ति, सेवा र अनुशासनको प्रबल प्रतीकको रूपमा काम गरिरहेका छन्।

कार्यक्रममा केन्द्रिय संस्कृति तथा पर्यटन मन्त्री गजेन्द्र सिंह शेखावतले भने, नागपुरमा डा. हेडगेवारद्वारा सुरु गरिएको यो यात्रा आज विश्वको सबैभन्दा ठूलो सांस्कृतिक-सामाजिक संगठन बनेको छ। शेखावतले भने, संघले व्यक्तित्व निर्माणबाट समाज निर्माण र समाज निर्माणबाट राष्ट्र निर्माणको मन्त्रद्वारा भारतलाई नयाँ दिशा दिएको छ।

उनले भने, समाजको प्रत्येक क्षेत्रमा संघले काम गरेको छ। प्राकृतिक आपदादेखि सामाजिक सरोकारसम्म, संघका स्वयंसेवक सधैं अग्रिम पंक्तिमा देखिन्छन्। अनुशासन र एकताको साथ समाजलाई जोड्ने काम संघले निरन्तर गरिरहेको छ।

उल्लेखनीय छ, संघको स्थापना सन् १९२५ मा विजयादशमीको दिन नागपुरमा भएको थियो। त्यस दिनदेखि आजसम्म संघ समाजका विभिन्न क्षेत्रमा सक्रिय रहँदै आएको छ र स्वयंसेवकहरूको सेवा भावले यसलाई विश्वकै सबैभन्दा ठूलो स्वयंसेवी संगठन बनाएको छ।

हिन्दुस्थान समाचार / भवानी थामी