कोलकाता, ६ नोभेम्बर (हि.स.)। पश्चिम बंगालको नदिया जिल्लाको नवद्वीपमा बुधबार राति केन्द्रिय शिक्षा राज्यमन्त्री तथा प्रदेश भाजपाका पूर्व अध्यक्ष सुकान्त मजुमदारको काफिलामाथि आक्रमण भएको आरोप लगाइएको छ। मजुमदार पार्टीका कार्यक्रमहरूमा सहभागी भएर फर्कँदै गर्दा घटना भएको हो।

भाजपाको आरोपअनुसार, नवद्वीपको मुख्य बस स्ट्यान्ड नजिक टीएमसी र भाजपा समर्थकबीच झडप भइरहेका बेला मन्त्रीको काफिला त्यहाँ फँसेको थियो। त्यही समयमा सत्तारूढ दलका केही कार्यकर्ताले काफिलामा रहेका सवारी साधनमाथि आक्रमण गरेको बताइएको छ।

मजुमदारले दाबी गरेका छन्, आक्रमण बिना कुनै उकसावा गरिएको थियो र आक्रमणकारीहरू नशाको अवस्थामा थिए। उनले भने, भाजपा कार्यकर्तामध्ये केहीलाई कुटपिट गरियो, जसमा केही गम्भीर रूपमा घाइते भएका छन्। घटनापछि मन्त्रीको काफिला सुरक्षित रूपमा त्यहाँबाट निस्किएको जनाइएको छ।

स्थानीय तृणमूल कांग्रेस नेतृत्वले सबै आरोप अस्वीकार गरेको छ। नवद्वीप नगरपालिकाका अध्यक्ष विमन साहाका अनुसार, तनाउ तब शुरु भयो जब भाजपा समर्थकहरूले टीएमसीको ट्रेड युनियन शाखा आईएनटीटीयूसीको स्थानीय कार्यालयमा आक्रमण गरे। त्यसपछि बस स्ट्यान्ड नजिक आईएनटीटीयूसी समर्थकहरूको विरोध प्रदर्शनका क्रममा दुबै समूहबीच पुनः झडप भएको हो।

उल्लेखनीय छ, पछिल्ला महिनाहरूमा पश्चिम बंगालमा भाजपा नेताहरूका काफिलामाथि आक्रमणका घटनाहरू बारम्बार भइरहेका छन्। गत महिनामा माल्दा जिल्लाका भाजपा सांसद खगेन मुर्मूको गाडीमाथि जलपाइगढ़ीमा आक्रमण भएको थियो, जसमा उनी गम्भीर रूपमा घाइते भएका थिए र हाल पनि उपचाररत छन्। त्यस्तै, अक्टोबर महिनामा दार्जिलिङका भाजपा सांसद राजु विष्टको काफिलामाथि पनि सुकिया पोखरी क्षेत्रमा तृणमूल समर्थकहरूले आक्रमण गरेको आरोप लागेको थियो।

हिन्दुस्थान समाचार / भवानी थामी