पटना, ७ नोभेम्बर (हि.स.)। केन्द्रिय गृहमन्त्री तथा भारतीय जनता पार्टी (भाजपा)का वरिष्ठ नेता अमित शाहले शुक्रबार पटनामा राष्ट्रगीत ‘वन्दे मातरम्’ को १५० औँ वर्षगाँठ मनाउने अवसरमा देशव्यापी अभियान शुरु गर्ने घोषणा गरे। यस अभियानको उद्देश्य देशभर विभिन्न स्थानीय भाषाहरूमा यस गीतको प्रचार–प्रसार गर्नु रहेको छ।

अमित शाहले भने, यो राष्ट्रव्यापी अभियान चरणबद्ध रूपमा सञ्चालन गरिनेछ, जसअन्तर्गत धेरै मानिसहरूले यस गीतलाई विभिन्न स्थानीय भाषामा अनुवाद गरी यसको सन्देश फैलाउनेछन्। साथै यस अभियानमा एक डिजिटल पहल पनि रहनेछ, जसको विषय “#वन्देमातरम्150” हुनेछ र यसलाई सामाजिक सञ्जालमार्फत प्रसारित गरिनेछ।

समारोहका क्रममा केन्द्रिय गृहमन्त्री अमित शाहले केन्द्रिय शिक्षा मन्त्री धर्मेन्द्र प्रधान र भाजपा नेता विनोद तावडेसँगै ‘स्वदेशी सङ्कल्प पत्र’ को पनि संकल्प लिए। शाहले घोषणा गरे, ‘वन्दे मातरम्’ अभियान देशभर चलाइनेछ र यसलाई प्रत्येक भारतीय भाषामा प्रचारित गरिनेछ, ताकि यसको भावना प्रत्येक नागरिकसम्म पुग्न सकोस्। उनले भने, “भारत कुनै जमिनको टुक्रा मात्र होइन, यो एक संस्कृति हो, एक विचार हो। यही संस्कृति नै हामीलाई एक सूत्रमा बाँध्छ।”

शाहले जनसंघ तथा भाजपा भएको राष्ट्रवादी विचारधारालाई स्मरण गर्दै भने, पार्टीले सधैं राष्ट्रिय हित र स्वदेशी भावनालाई प्राथमिकता दिएको छ। यसक्रममा कार्यक्रममा उपस्थित सबैले ‘स्वदेशी सङ्कल्प पत्र’ पढेर विदेशी वस्तुको सट्टा भारतीय उत्पादन अपनाउने, गाउँ–गाउँमा स्थानीय उत्पादनलाई प्रोत्साहन दिने, युवालाई स्वदेशीको महत्वबारे सचेत गराउने प्रतिज्ञा गरे। साथै भारतीय भाषाहरूको बढ़ी प्रयोग गर्नुपर्छ भन्नेमा पनि जोड दिइयो।

बिहार विधानसभाको चुनाउका लागि अमित शाह आज पनि राष्ट्रिय जनतान्त्रिक गठबन्धन (राजग) का पक्षमा प्रचारमा छन्। उनी आज जमुई र भागलपुरमा जनसभामा सहभागी हुने तथा पूर्णियामा रोड शो गर्ने कार्यक्रम छ। पूर्णियाको रोड शो सदर विधानसभा क्षेत्रको आर.एन. साह चौकस्थित वीर सिंह स्मारकबाट शुरु भई लखन लाल चौक, खीरु चौक हुँदै आस्था मन्दिरमा समाप्त हुनेछ।

हिन्दुस्थान समाचार / भवानी थामी