गान्तोक, 15 जुलाई (हि.स.)। मुख्यमन्त्री प्रेमसिंह तामाङले विश्व युवा कौशल दिवस 2025 को अवसरमा सिक्किमका जनता, विशेषगरी गतिशील र प्रतिभाशाली युवाहरूलाई हार्दिक बधाई एवं शुभकामना दिएका छन्। उनले यस वर्षको विषय 'एआई र डिजिटल कौशलमार्फत युवा सशक्तिकरण' समयसापेक्ष र महत्त्वपूर्ण रहेको बताएका छन्।

मुख्यमन्त्री तामाङले आज जारी आफ्नो सन्देशमा भने, युवाहरू हाम्रो भविष्यका शिल्पकार हुन्। डिजिटल संसारमा सफल हुन आवश्यक पर्ने उपकरणहरू, सीपहरू र अवसरहरूद्वारा उनीहरूलाई सशक्त बनाउनु अत्यावश्यक छ। उनले सिक्किम सरकार युवाहरूलाई अर्थपूर्ण कौशल विकास पहलहरूसँग जोड्न पूर्ण रूपमा प्रतिबद्ध रहेको बताएका छन्, जसले उनीहरूलाई आत्मविश्वासका साथ वर्तमान र भविष्यका चुनौतीहरूको सामना गर्न तयार गर्नेछ।

मुख्यमन्त्रीले 'सुनौलो, समृद्ध र समर्थ सिक्किम' को दृष्टिकोणलाई साकार पार्ने दिशामा सरकार 'सक्षम' र 'कौशल' सम्पन्न नागरिकहरूको पुस्ता सिर्जना गर्न सक्रिय रूपमा काम गरिरहेका बताएका छन्। उनले कौशल विकास र रोजगारी सिर्जना सरकारको आर्थिक वृद्धि र सामाजिक विकास रणनीतिको आधारशिला रहेको बताएका छन्। यस उद्देश्यको प्राप्तिका लागि सरकारले रोजगारी बढाउने, उद्यमशीलतालाई प्रोत्साहन गर्ने, उद्योग आवश्यकताहरू र कार्यबल क्षमताहरू बीचको खाडललाई कम गर्न विभिन्न अग्रगामी योजनाहरू र कार्यक्रमहरू शुरु गरेको उनले जानकारी गराएका छन्।

मुख्यमन्त्रीले कौशल विकास विभागले सिक्किम मोडेल करियर परामर्श केन्द्रहरू, नियुक्ति केन्द्र, प्रशिक्षुता कक्ष, कमाण्ड सेन्टर र प्लेसमेन्ट सेलसहित धेरै अग्रगामी संस्थाहरू स्थापना गरेको जानकारी गराउॅंदै खुशी व्यक्त गरेका छन्। उनले यी पहलहरू राज्य युवाहरूलाई सशक्त बनाउन, अन्तरराष्ट्रिय करियर मार्गहरू खोल्न र विश्वव्यापी मञ्चमा सिक्किमको प्रतिभा प्रदर्शन गर्न तयार गरिएको जानकारी गराएका छन्।

मुख्यमन्त्री तामाङले आफ्नो सन्देशमा प्रत्येक युवा व्यक्तिलाई जोश र उद्देश्यका साथ आफ्नो सपनाहरू पछ्याउन आग्रह गरेका छन्। उनले आफ्नो हृदयलाई पछ्याउन, जिज्ञासु बन्न तथा व्यक्तिगत र व्यावसायिक विकासको लागि प्रतिबद्ध रहन प्रोत्साहन पनि प्रदान गरेका छन्।

यसैगरी, उनले सबै सरोकारवालाहरू, शैक्षिक संस्थानहरू, उद्योगहरू, नागरिक समाज र निजी क्षेत्रलाई युवाहरूको शक्तिलाई परिवर्तनको वाहकको रूपमा पहिचान गर्न आह्वान पनि गरेका छन्। उनले आजको संसारमा महत्त्वपूर्ण एआई र डिजिटल सीपहरूले सुसज्जित गरेर उनीहरूको विकासमा सामूहिक रूपमा निवेश गरौं भनी आह्वान गरेका छन्।

हिन्दुस्थान समाचार / बिशाल