गान्तोक, 10 अगस्त (हि.स.)। रम्फू खेल मैदानमा आज पहिलो आमा सम्मान दिवस भव्यरूपमा सम्पन्न गरियो। मुख्यमन्त्री प्रेमसिंह तामाङको मुख्य आतिथ्यमा आयोजित उक्त कार्यक्रममा राज्यभरिबाट हजारौंको संख्यामा सबै उमेर वर्गका महिलाहरू उपस्थति थिए।

कार्यक्रममा विशेषगरि आमाहरूको सुविधालाई ध्यानमा राख्दै 'आमा सुविधा घर' पनि स्थापना गरिएको थियो। आमा सुविधा घर हेरचाह र आरामको प्रतीक बनेको देखियो, जसले आमा र बच्चाहरू दुवैबाट निकै प्रशंसा प्राप्त गऱ्यो। सुरक्षित र पालनपोषण गर्ने ठाउँको रूपमा परिकल्पना गरिएको यो सुविधा एक जीवन्त केन्द्र बनेको थियो, जहाँ महिला र बालबालिकाहरूका आवश्यकताहरूलाई ध्यानमा राखेर विशेष सुविधाहरू उपलब्ध गराइएको थियो।

मुख्यमन्त्री कार्यालयकी एसआईए एवं मिडिया समन्वयक दिछेन ओङ्गमु भोटियाले आज जारी विज्ञप्तिमा उल्लेख गरे अनुसार, सफा र आरामदायी विश्रामस्थलदेखि लिएर स्वच्छ, बालमैत्री सुविधाहरूसम्म, आमा सुविधा घरले सार्वजनिक हेरचाहको लागि विचारशील दृष्टिकोण प्रतिबिम्बित गर्दछ। आगन्तुक आमा र बच्चाहरूको अनुहारमा मुस्कान यस पहलको सफलताको सबैभन्दा शक्तिशाली प्रमाण हो।

उनले मुख्यमन्त्री प्रेमसिंह तामाङको दूरदर्शी नेतृत्व बिना यो पहल सफल हुने थिएन भनी बताएकी ​छन्। मुख्यमन्त्रीको महिला र बालबालिकाको कल्याणप्रतिको प्रतिबद्धता र समुदाय-केन्द्रित विकासको लागि उनको समावेशी दृष्टिकोणले यस्ता परिवर्तनकारी ठाउँहरूको लागि मार्ग प्रशस्त गरेको उनले उल्लेख गरेकी छन्। यो महान कार्यको शुरुवात गरेकोमा उनले गहिरो सम्मान र आभार पनि व्यक्त गरेकी छन्।

एसआईए भोटियाले रम्फू नगर पञ्चायतलाई पनि अमूल्य सहयोग र निर्बाध समन्वयको लागि धन्यवाद दिएकी छन्, जसले सुविधाको सहज स्थापना र सञ्चालनमा महत्त्वपूर्ण भूमिका खेलेको थियो। उनले नगर पञ्चायतको सक्रिय संलग्नताले सामुदायिक जिम्मेवारीको गहिरो भावनालाई प्रतिबिम्बित गर्दछ भनेकी छन्।

यसै क्रममा उनले आंगनवाडी कार्यकर्ताहरूलाई पनि हार्दिक धन्यवाद दिएकी छन्, जसको स्वैच्छिक सेवा, न्यानोपन र समर्पणले आमा सुविधा घरलाई करुणा र हेरचाहको भावनाले भरिपूर्ण बनायो।

मुख्यमन्त्री कार्यालयकी मिडिया समन्वयकले दूरदर्शिता, सामुदायिक भावना र हार्दिक सेवा एकसाथ मिलेर कार्य गरेको खण्डमा के हासिल गर्न सकिन्छ भन्ने कुराको आमा सुविधा घरले उत्कृष्ट उदाहरण प्रस्तुत गरेको बताएकी छन्। उनले यो त शुरुवात मात्र हो भन्दै निरन्तर सहकार्यका साथ राज्यव्यापी रूपमा हामी हेरचाहको यो आदर्श विस्तार गर्न तत्पर छौं भनी उल्लेख गरेकी छन्।

हिन्दुस्थान समाचार / बिशाल