गान्तोक, 09 अगस्त (हि.स.)। गान्तोकस्थित सेक्टर मुख्यालय सशस्त्र सीमा बल (एसएसबी) का अधिकारी तथा पदाधिकारीहरूले सिक्किम विश्वविद्यालय र हर्कमाया कलेज अफ् एजुकेशनका विद्यार्थीका साथै हेमन्त यादव फाउण्डेशनका सदस्यहरूसँग मार्चाकमा रक्षा बन्धन पालन गरे। उक्त जानकारी पीआईबीले दिएको छ।
सिक्किम विश्वविद्यालयकी प्राध्यापक डा. सुजाता उपाध्याय र हर्कमाया कलेज अफ् एडुकेशनकी सहायक प्राध्यापक सुतापा बर्मनले रक्षा बन्धनको महत्त्वमाथि प्रकाश पार्दै राष्ट्रको सिमानाको रक्षा गर्न र एकता र सद्भाव प्रवर्द्धन गर्न एसएसबीको प्रयासको प्रशंसा गरे।
उत्सवमा परम्परागत राखी बाँध्ने समारोह सामेल थियो, जहाँ हेमन्त यादव फाउण्डेशनका विद्यार्थी र सदस्यहरूले एसएसबीका अधिकारी र पदाधिकारीहरू, दुवै विश्वविद्यालयका प्राध्यापकहरूलाई राखी बाँधेर मिठाई वितरण गरे।
गान्तोकस्थित सेक्टर मुख्यालय एसएसबीका सेकेण्ड-इन कमाण्ड सुनिल कुमारले रक्षा बन्धन समारोहमा भाग लिएकोमा प्राध्यापक, विद्यार्थी र हेमन्त यादव फाउण्डेसनका सदस्यहरूप्रति कृतज्ञता व्यक्त गरे।
हिन्दुस्थान समाचार / बिशाल
