नाम्ची, 25 सेप्टेम्बर (हि.स.)। भारतीय गुणवत्ता परिषद् (क्यूसीआई) का प्रतिनिधि डा. सुभाष चन्दरले बुधवार नाम्चीस्थित जिल्ला पशु चिकित्सा पोलिक्लिनिकको भ्रमण गरे। डा. चन्दरलाई पशुपालन एवं दुग्ध विभागले केन्द्रिय क्षेत्र योजना- पशुधन स्वास्थ्य र रोग नियन्त्रण कार्यक्रम (एलएचडीसीपी) को कार्यान्वयनको मूल्याङ्कन गर्न नियुक्त गरेको पशु चिकित्सा एवं पशुपालन विभागले आज विज्ञप्तिमा बताएको छ।
भ्रमणको मुख्य उद्देश्य सरोकारवालाहरू, विशेष गरी किसानहरूमा एलएचडीसीपीको प्रभावको मूल्याङ्कन गर्नु र योजना अन्तर्गत पशु चिकित्सा स्वास्थ्य सेवाहरूको गुणस्तर र प्रभावकारिताको समीक्षा गर्नु थियो। भ्रमणको क्रममा डा. चन्दरले पूर्वाधार र सुविधाहरू, खोप कार्यक्रम, कार्यबल र तैनाती, कृषकहरूका लागि प्रशिक्षण एवं जागरूकता कार्यक्रम, चुनौतीहरू आदि विषय जानकारी लिए।
पोलिक्लिनिककी अधीक्षक डा. प्रेरणा गुरुङ, डा. एकता प्रधान, डा. अस्तुति राई र डा. कर्मकित लेप्चाले सबै प्रश्नहरूलाई सम्बोधित गरेका थिए। यस क्रममा डा. चन्दरलाई विभिन्न दस्तावेजहरू पनि साझा गरिएको थियो।
डा. चन्दरको भ्रमण सफलतापूर्वक सम्पन्न भएको र नाम्ची जिल्लामा एलएचडीसीपी कार्यान्वयनको प्रगति, उपलब्धि र चुनौतीहरू प्रस्तुत गर्न एक बहुमूल्य मञ्च प्रदान गरेको बताइएको छ। भ्रमणको क्रममा गरिएका छलफल र निरीक्षणहरूले डीएएचडीद्वारा योजनाको व्यापक मूल्याङ्कनमा योगदान पुर्याउने विभागले विश्वास व्यक्त गरेको छ।
हिन्दुस्थान समाचार / बिशाल
25 Sep 2025
