नाम्ची, 14 जनवरी (हि.स.)। सिक्किमका राज्यपाल ओमप्रकाश माथुरले आज मुख्यमन्त्री प्रेमसिंह तामाङको उपस्थितिमा जोरथाङमा आयोजित १५औँ सिक्किम सारस व्यापार मेलाको औपचारिक उद्घाटन गरे। यस अवसरमा राज्य विधानसभाकी उपाध्यक्ष राजकुमारी थापा, मन्त्रीहरू अरुण कुमार उप्रेती, साम्डुप लेप्चा, पुरण कुमार गुरुङ र टीटी भोटिया, विधायकगण, लोकसभा सांसद डा. इन्द्रहाङ सुब्बा तथा राज्य सरकारका वरिष्ठ अधिकारीहरूको उपस्थिति रहेको थियो।

सारस व्यापार मेला भारत सरकारको ग्रामीण विकास मन्त्रालयको एक प्रमुख पहल हो, जसलाई दीनदयाल अन्त्योदय योजना–राष्ट्रिय ग्रामीण जीविकोपार्जन मिशन अन्तर्गत आयोजना गरिन्छ। यस मेलाको उद्देश्य ग्रामीण शिल्पकारहरू तथा स्वयं सहायता समूहहरूलाई आफ्ना उत्पादनहरू प्रदर्शन तथा बिक्रीका लागि प्रत्यक्ष मञ्च उपलब्ध गराई ग्रामीण जीविकोपार्जनलाई सुदृढ़ बनाउनु हो।

यस व्यापार मेलामा देशका विभिन्न राज्यबाट आएका २४ सहभागीहरू सहित कुल ११६ प्रदर्शकहरूको सहभागिता रहेको छ। साथै विभागीय स्टलहरू पनि रहेका छन्, जसले ग्रामीण भारतको विविध शिल्पकला र उद्यमशील भावनालाई प्रतिबिम्बित गर्दछ।

---------------

हिन्दुस्थान समाचार / बिशाल