नयाँ दिल्ली, १० अक्टोबर (हि.स.)। भारतीय जनता पार्टी (भाजपा) का राष्ट्रिय अध्यक्ष नितिन नवीनले राहुल गान्धी, अरविन्द केजरीवाल र विपक्षी गठबन्धनमाथि कडा प्रहार गरेका छन्। उनले विपक्षी दलहरूले लोकतान्त्रिक जनादेशलाई स्वीकार गर्नुको सट्टा देशमा अस्थिरता सिर्जना गर्ने प्रयास गरिरहेको आरोप लगाएका छन्। नवीनले देशका १४० करोड जनता शान्ति र विकासको मार्गमा अघि बढिरहेको भए पनि विपक्षीहरूलाई भारतको प्रगति र उन्नति मन नपरेको बताएका छन्। उनले देशलाई अस्थिर बनाउने प्रयास सह्य नहुने चेताउनी दिएका छन्।

शनिबार जारी वक्तव्यमा नितिन नवीनले देशमा अराजकताको प्रतिस्पर्धामा लागेका दुई राजनीतिक समूह सक्रिय रहेको बताए। एउटा समूहको नेतृत्व राहुल गान्धीको नेतृत्वमा रहेको विपक्षी गठबन्धनले गरिरहेको छ भने अर्को समूहमा अरविन्द केजरीवालका सहयोगीहरू रहेको उनले बताए। जनताले विपक्षीहरूको यस्तो गतिविधिलाई नियालिरहेको उल्लेख गर्दै लोकतन्त्रमा जनादेशको सम्मान गर्नु सबै राजनीतिक दलको जिम्मेवारी भएको उनले बताए।

भाजपा अध्यक्षले देशलाई अस्थिर बनाउने प्रयासका पछाडि राजनीतिक उद्देश्यका साथै विदेशी शक्तिहरूको पनि हात रहेको आरोप लगाए। विश्वव्यापी सङ्कटका बावजुद भारत विकासको मार्गमा अघि बढिरहेको र आत्मनिर्भर तथा सशक्त राष्ट्रका रूपमा आफ्नो पहिचान बलियो बनाउँदै गएको उनले बताए। तर, विपक्षीहरूलाई भारतको यो प्रगति स्वीकार्य नभएको उनको आरोप छ।

नवीनले भारतीय लोकतन्त्र र देशभक्त जनताको शक्तिले विपक्षीहरूको यस्तो मनसाय सफल हुन नदिने बताए। संविधान र लोकतन्त्रको नाममा झुट फैलाएर जनादेशलाई चुनौती दिनु जनताको अपमान भएको उनले चेताउनी दिए।

प्रधानमन्त्री नरेन्द्र मोदीको नेतृत्वमा विगत १२ वर्षमा देशलाई भयको वातावरणबाट बाहिर निकाल्ने, आतङ्कवाद नियन्त्रण गर्ने र नक्सलवाद अन्त्य गर्ने प्रयास गरिएको उनले बताए। यद्यपि, केही मानिसले अझै पनि सहरी नक्सलवादी मानसिकतामार्फत देशलाई अस्थिर बनाउने प्रयास गरिरहेको उनको आरोप छ।

राहुल गान्धी र विपक्षी गठबन्धनका नेताहरूको अभिव्यक्ति तथा संवैधानिक संस्थाहरूप्रतिको उनीहरूको व्यवहारलाई देशका जनताले नियालिरहेको नवीनले बताए। भारतका युवाहरू संविधान, लोकतन्त्र र भारतीय संस्कृतिप्रति प्रतिबद्ध रहेको उल्लेख गर्दै उनीहरूले यस्तो राजनीतिलाई स्वीकार नगर्ने उनले दाबी गरे।

लगातारको चुनावी पराजयबाट उत्पन्न निराशाका कारण विपक्षीहरूले देशमा तनावको वातावरण सिर्जना गर्ने प्रयास गरिरहेको पनि भाजपा अध्यक्षले आरोप लगाए। भारतीय जनता पार्टीका कार्यकर्ताहरू जनतामाझ रहेर यस्ता प्रयासको जवाफ दिने उनले बताए।

प्रधानमन्त्री मोदीको नेतृत्वमा देशको विकासको गति कायम राख्न र जनताको विश्वास अझ बलियो बनाउन भाजपा प्रतिबद्ध रहेको नवीनले बताए। भारतको शान्ति, स्थिरता र विकासमा बाधा पुर्याउने प्रयास गर्ने देशभित्र वा बाहिरका सबै शक्तिसँग कडाइका साथ सामना गरिने उनले स्पष्ट पारे।

हिन्दुस्थान समाचार / भवानी थामी