मुम्बई, १० अक्टोबर (हि.स.)। मुख्य निर्वाचन आयुक्त ज्ञानेश कुमार विरुद्ध कक्रोच जनता पार्टी (सीजेपी) ले आह्वान गरेको विरोध प्रदर्शनलाई समर्थन गर्दै मुम्बईमा प्रदर्शन गर्नुअघि महात्मा गान्धीका पलाति तथा सामाजिक कार्यकर्ता तुषार गान्धीलाई पुलिसले शनिवार नियन्त्रणमा लिएको छ।

तुषार गान्धी मुम्बईको अगस्त क्रान्ति मैदानमा दिउँसो ३:३० बजी प्रदर्शन गर्ने तयारीमा थिए। पुलिस अनुसार, उनलाई बान्द्राबाट हिरासतमा लिएर डीएन नगर पुलिस चौकी लगिएको छ। ‘हम भारत के लोग’ सङ्गठनसँग आबद्ध कार्यकर्ता फिरोज मिथिबोरवालालाई पनि उनको निवासबाट हिरासतमा लिएर एमआईडीसी पुलिस चौकी लगिएको छ। तुषार गान्धीले सामाजिक सञ्जाल ‘एक्स’ मा पोस्टर साझा गर्दै नागरिकहरूलाई प्रदर्शनमा सहभागी हुन आह्वान गरेका थिए।

पुलिस अधिकारी अनुसार, कार्यक्रमका लागि गामदेवी पुलिस चौकीमा कुनै निवेदन प्राप्त भएको थिएन र प्रदर्शनको आधिकारिक अनुमति पनि दिइएको थिएन। बम्बई उच्च अदालतको आदेशअनुसार अगस्त क्रान्ति मैदानलाई विरोध प्रदर्शनस्थलका रूपमा तोकिएको छैन। त्यसैले शान्ति र सुरक्षा कायम राख्न सावधानीस्वरूप कारबाही गरिएको पुलिसले जनाएको छ।

सीजेपीले मुख्य निर्वाचन आयुक्त ज्ञानेश कुमार विरुद्ध नयाँ दिल्लीको जन्तर-मन्तरमा विरोध प्रदर्शन गर्ने आह्वान गरेको छ। मतदाता सूचीमा कथित हेरफेर, विशेष सघन पुनरावलोकन (एसआईआर) प्रक्रियामा अनियमितता र मतदाता दर्ताका लागि प्रयोग हुने फारम–६ मा गरिएका परिवर्तनबारे पार्टीले प्रश्न उठाएको छ। मुम्बईमा प्रस्तावित प्रदर्शन पनि यही आन्दोलनको समर्थनमा आयोजना गर्न लागिएको थियो।

/ बिशाल