सहारनपुर, १० अक्टोबर (हि.स.)। उत्तर प्रदेशको सहारनपुर जिल्लामा शाकम्भरी देवीबाट माताको ज्योत लिएर पैदलयात्रा गर्दै फर्किरहेका श्रद्धालुहरूलाई शनिवार बिहान देवबन्दमा राजमार्ग स्थित फ्लाइओभरमा भाँड़ाकुँड़ा बोकेको क्यान्टरले ठक्कर दिँदा चार जनाको मृत्यु भएको छ भने १५ जनाभन्दा बढ़ी घाइते भएका छन्। मृतकहरू मेरठ जिल्लाको सरधना क्षेत्र स्थित कुशावली गाउँका बासिन्दा थिए। दुर्घटनापछि घटनास्थलमा कोकोहोलो मच्चियो। पुलिस र स्थानीय बासिन्दाले घाइतेहरूलाई अस्पताल पुर्याए।

घटनाको जानकारी पाएपछि जिल्लाधिकारी अरविन्द चौहान र वरिष्ठ पुलिस अधीक्षक अभिनन्दन सहारनपुरको जिल्ला अस्पताल पुगे। उनीहरूले घाइतेहरूको अवस्थाबारे जानकारी लिँदै स्वास्थ्य विभागका अधिकारीहरूलाई उनीहरूको उचित उपचारको व्यवस्था गर्न निर्देश दिए। जिल्लाधिकारी अनुसार, सरधना क्षेत्रको कुशावली गाउँका लगभग १९ जना व्यक्ति ७ अक्टोबरमा ट्र्याक्टर–ट्रलीमा शाकम्भरी देवीको दर्शन गर्न गएका थिए। शनिवार बिहान लगभग 7 बजी उनीहरू माताको ज्योत लिएर पैदलयात्रा गर्दै घर फर्किरहेका थिए। यसै क्रममा देवबन्दमा राजमार्ग स्थित फ्लाइओभरमा पछाड़ीबाट तीव्र गतिमा आएको भाँड़ाकुँड़ा बोकेको क्यान्टरले ट्र्याक्टर–ट्रलीलाई ठक्कर दियो। अचानक भएको दुर्घटनामा कुशावली गाउँका रमेश (४०), सागर (४०), अमन (२३) र सत्येन्द्रको मृत्यु भयो। दुर्घटनामा १५ जनाभन्दा बढ़ी श्रद्धालु घाइते भएका छन्। घटनाको सूचना पाउनासाथ पुलिस टोली घटनास्थलमा पुग्यो।

क्षेत्राधिकारी अमित कुमार सिंहले दुर्घटनामा चार जनाको मृत्यु भएको पुष्टि गरेका छन्। उनले क्यान्टरका चालक र सहचालकलाई हिरासतमा लिइएको जानकारी दिए। पुलिसले दुर्घटनाको कारण पत्ता लगाउन अनुसन्धान गरिरहेको छ र घटनामा थप कानुनी कारबाही अघि बढ़ाइएको छ। प्रारम्भिक उपचारपछि गम्भीर रूपमा घाइते भएकाहरूलाई सहारनपुर र मेरठका अस्पतालमा थप उपचारका लागि पठाइएको छ।

हिन्दुस्थान समाचार / भवानी थामी