नागपुर, १५ अक्टोबर (हि.स.)। केन्द्र सरकार विरुद्ध विभिन्न मुद्दालाई लिएर देशभरि भइरहेका आन्दोलन तथा विशेषगरी युवापुस्तामा व्याप्त असन्तुष्टिलाई माओवादी सङ्गठनहरूले आफ्नो राजनीतिक उद्देश्यका लागि प्रयोग गर्ने तयारी गरिरहेका छन्? सुरक्षा निकायको हातमा परेको माओवादी सङ्गठनका दुई वरिष्ठ पदाधिकारीबीचको कथित गोप्य पत्रले यस्तो प्रश्न उठाएको छ। पत्रमा उल्लेख गरिएका भनाइका कारण यो विषय गम्भीर बनेको छ। महाराष्ट्रका वरिष्ठ पुलिस अधिकारीहरूले यस्तो पत्र प्राप्त भएको पुष्टि गरेका छन्।

पुलिस सूत्रहरू अनुसार, माओवादी सङ्गठनको अन्तरराष्ट्रिय विभागमा सक्रिय ‘कमरेड धीरज’ ले वरिष्ठ माओवादी पदाधिकारी ‘कमरेड अजित उर्फ के. मुरलीधरन’ लाई उक्त पत्र पठाएका हुन्। पत्रमा ‘वाईवाई’ नामक सांकेतिक नामले उल्लेख गरिएको व्यक्तिले सरकारविरोधी आन्दोलनका लागि विशेष रणनीति तयार पारेको दाबी गरिएको बताइएको छ।

‘जेन जी’लाई प्रयोग गर्ने रणनीति कथित पत्र अनुसार आगामी जनआन्दोलन तथा राजनीतिक सङ्घर्षलाई तीव्र बनाउन ‘जेन जी’ सञ्जाललाई सक्रिय रूपमा प्रयोग गर्ने योजना बनाइएको छ। विभिन्न मुद्दामा सरकार विरुद्ध उत्पन्न असन्तुष्टिलाई थप व्यापक बनाउन युवाहरूलाई आन्दोलनको केन्द्रमा ल्याउने कुरा उल्लेख गरिएको बताइएको छ। यस बाहेक युवाहरूको सहभागिता मार्फत तल्लो तहमा सरकार विरोधी अभियान सञ्चालन गर्ने, जनआन्दोलनको विस्तार गर्ने तथा सरकारमाथि राजनीतिक दबाब बढ़ाउने जस्ता विषय पनि कथित कार्ययोजनामा समावेश रहेको जानकारी दिइएको छ।

आन्दोलनका क्रममा हिंसा वा अन्य अप्रिय घटना भए त्यसका लागि सरकारलाई जिम्मेवार ठहर्याउने रणनीति तयार गरिएको दाबी समेत गरिएको छ।

सात राज्यका भूमिगत कार्यकर्तालाई एकजुट गर्ने तयारी

कथित पत्रमा महाराष्ट्र, झारखण्ड, दिल्ली, हिमाचल प्रदेश, तेलङ्गाना, आन्ध्र प्रदेश र ओडिशा सहित सात राज्यमा सक्रिय भूमिगत शहरी माओवादी सहयोगीहरूलाई पुनः एकजुट गर्ने योजना समेत उल्लेख गरिएको बताइएको छ। यी उल्लेखका आधारमा निश्चित समयतालिका अनुसार सरकार विरोधी जनआन्दोलनलाई थप व्यापक र आक्रामक स्वरूप दिने प्रयास हुनसक्ने आशङ्का व्यक्त गरिएको छ। यद्यपि, पत्रमा गरिएका कथित दाबीहरूको स्वतन्त्र पुष्टि भएको सम्बन्धमा कुनै जानकारी सार्वजनिक भएको छैन।

‘भारत जोड़ो अभियान’ सँग आन्दोलनलाई जोड्ने उल्लेख

यस विषयमा सबैभन्दा बढ़ी चर्चा साल २०२४ को लोकसभा निर्वाचनका क्रममा सञ्चालन गरिएको ‘भारत जोड़ो अभियान’ सँग सम्बन्धित कथित उल्लेखलाई लिएर भइरहेको छ।

प्राप्त जानकारी अनुसार, पत्रमा ‘वाईवाई’ नामक सांकेतिक नामले उल्लेख गरिएको व्यक्तिको रणनीति अन्तर्गत ‘जेन जी’ तथा सरकार विरोधी धारणा राख्ने युवाहरूका आन्दोलनलाई उक्त अभियानसँग जोड्ने योजना रहेको दाबी गरिएको छ। कथित पत्र अनुसार यस माध्यमबाट विभिन्न आन्दोलनलाई एउटै साझा मञ्चमा ल्याएर सरकार विरुद्ध व्यापक राजनीतिक दबाब सिर्जना गर्ने प्रयास हुनसक्छ। केही राजनीतिक दलहरूले यस्ता संयुक्त प्रयासमा सहभागी हुन सहमति जनाएको उल्लेख समेत पत्रमा रहेको दाबी गरिएको छ।

हिन्दुस्थान समाचार / भवानी थामी