कोलकाता, १8 अक्टोबर (हि.स.)। कोलकाताको चोरबागान दुर्गापूजा पण्डालमा भएको भागदौडमा १९ जनाको मृत्यु भएपछि कोलकाता पुलिसले कारबाही शुरु गरेको छ। पुलिसले लापरवाहीका लागि पूजा आयोजकहरूविरुद्ध स्वतः संज्ञान लिँदै प्राथमिकी (एफआईआर) दर्ता गरेको छ। यसका साथै सुरक्षा व्यवस्था सुनिश्चित गर्न र शान्ति कायम राख्ने उद्देश्यले चोरबागानसँग जोडिएका केही निश्चित क्षेत्रमा मङ्गलबार (नवमी) सम्मका लागि भारतीय नागरिक सुरक्षा संहिता (बीएनएसएस) को धारा १६३ लागू गरेको छ।

कोलकाताका पुलिस आयुक्त अजय नन्दले आइतबार बिहान जारी गरेको आदेशअनुसार, यी क्षेत्रमा पाँच वा त्यसभन्दा बढी व्यक्तिको जमघटमा कडा प्रतिबन्ध लगाइएको छ। पुलिसका अनुसार, आयोजकहरूविरुद्ध भारतीय न्याय संहिता (बीएनएस) को धारा १०५ (गैरइरादतन हत्या), धारा ११० (गैरइरादतन हत्याको प्रयास) र धारा ३(५) (समान उद्देश्यका साथ समूहद्वारा अपराध) अन्तर्गत मुद्दा दर्ता गरिएको छ। घटनाको गहिराइसम्म पुग्न पुलिसले हालसम्म १४ जनालाई नियन्त्रणमा लिएको छ। उनीहरूसँग गहन सोधपुछ भइरहेको छ। सात जनालाई पक्राउ गरिएको छ।

पुलिस आयुक्तको अधिसूचनाअनुसार, निषेधाज्ञा मुख्य रूपमा बऊबजार थाना क्षेत्रका चोरबागान पूजा पण्डालनजिकका केही भागमा लागू हुनेछ। यसमा कलेज स्ट्रिटको कोलूटोला स्ट्रिटदेखि इडेन अस्पताल रोडसम्मको भाग, चित्तरञ्जन एभेन्यु (सीआर एभेन्यु) को कोलूटोला स्ट्रिटदेखि इडेन अस्पताल रोडसम्मको भाग, कोलूटोला स्ट्रिटको कलेज स्ट्रिटदेखि सीआर एभेन्युसम्मको भाग र इडेन अस्पताल रोडको सीआर एभेन्युदेखि कलेज स्ट्रिटसम्मको क्षेत्र समावेश छन्।

आदेशमा यी क्षेत्रमा लाठी वा कुनै पनि प्रकारको हतियार बोकेर हिँड्न पूर्ण प्रतिबन्ध लगाइएको स्पष्ट पारिएको छ। यद्यपि, यो प्रतिबन्ध सम्पूर्ण बऊबजार थाना क्षेत्रमा लागू हुने छैन।

राज्यपालद्वारा परिस्थितिको निरीक्षण

यसैबीच, आइतबार बिहान पुलिस आयुक्त अजय नन्द र राज्यका राज्यपाल आरएन रविले परिस्थितिको जायजा लिन कोलकाता मेडिकल कलेज तथा अस्पतालको भ्रमण गरेका छन्। उनीहरूले अस्पतालमा भर्ना गरिएका घाइतेहरूसँग भेट गरी उनीहरूको स्वास्थ्य अवस्थाबारे जानकारी लिएका छन्।

यसअघि शनिबार राति मुख्यमन्त्री शुभेन्दु अधिकारीले घटनाको निष्पक्ष छानबिन गर्ने आश्वासन दिएका थिए। उनले विशेष कार्यदल (एसटीएफ), अपराध अनुसन्धान विभाग (सीआईडी) र दमकल विभागका टोलीहरूले घटनास्थलबाट आवश्यक नमुना तथा प्रमाण सङ्कलन गर्ने बताएका थिए।

मुख्यमन्त्रीले विषयवस्तुमा आधारित पूजा पण्डाल बनाउने बढ्दो चलनप्रति पनि गहिरो चिन्ता व्यक्त गरेका थिए। उनले भविष्यमा यस्ता विषयवस्तुमा आधारित पूजाका सम्बन्धमा प्रशासनले नयाँ सिराबाट विचार गर्नुपर्ने स्पष्ट पारे। कुनै पनि विषयवस्तुभन्दा मानिसहरूको जीवन धेरै महत्त्वपूर्ण रहेको उल्लेख गर्दै उनले यस दुःखद घटनाबाट प्राप्त पाठलाई भविष्यको व्यवस्थापनमा लागू गरिने बताएका छन्।

हिन्दुस्थान समाचार / भवानी थामी