कोलकाता, १८ अक्टोबर (हि.स.)। महासप्तमीको साँझ कोलकाताको चोरबगान सार्वजनिक पूजा पंडालमा भएको भागदौड एउटा भयानक त्रासदीमा परिणत भयो। आइतबार बिहानसम्म दुर्घटनामा 18 जनाको ज्यान गएको छ भने 25 जना गम्भीर घाइते भएका छन्। राज्य सरकारले यस घटनालाई कडाइका साथ लिएको छ र कडा कदम चालेको छ। द्रुत कारबाही गर्दै पुलिसले भिड नियन्त्रण र सुरक्षामा लापरवाही गरेको आशंकामा पूजा समितिका आयोजक र स्वयंसेवकसहित 12 जनालाई हिरासतमा लिएको छ। मुख्यमन्त्री सुभेन्दु अधिकारी र स्वास्थ्य मन्त्री शारद्वत मुखोपाध्यायसंग कोलकाता मेडिकल कलेजमा परिस्थितिको जायजा लिन पुगे र दोषीहरू विरुद्ध कडा कारबाही गर्ने आश्वासन दिए।
पुलिस र आपदा प्रबन्धन विभागका अनुसार, सप्तमी साँझ अचानक भारी वर्षा र बाहिर भारी ट्राफिक जामका कारण सयौं आगन्तुकले एकसाथ पंडालभित्र प्रवेश गर्ने प्रयास गरेका थिए। यसैबिच भित्र भागदौड जस्तो अवस्था उत्पन्न भयो। सूचना पाएपछि फायर ब्रिगेड, कोलकाता पुलिस र आपदा प्रबन्धन समूह घटनास्थलमा पुग्यो र उद्धार कार्य शुरु गऱ्यो र घाइतेहरूलाई कोलकाता मेडिकल कलेजमा लगियो, जहाँ उपचारका क्रममा मृतकको सङ्ख्या 18 पुगेको छ।
मुख्यमन्त्री सुभेन्दु अधिकारीले कलकत्ता उच्च न्यायालयका मुख्य न्यायाधीशलाई वर्तमान न्यायाधीशको नेतृत्वमा विशेष कार्य बल (एसटीएफ) गठन गर्न अपील गर्ने घोषणा गर्दै पत्र लेखेका छन्। मुख्यमन्त्रीले यस त्रासदीको न्यायिक जाँचका लागि आइतबार उच्च अदालतमा औपचारिक अनुरोध गरिने स्पष्ट पारे। उनले मृतकका आफन्तलाई 25 लाख रुपियाँ र परिवारका एक सदस्यलाई ग्रुप-डी सरकारी जागिर दिने घोषणा पनि गरे। घाइतेहरूलाई 5 लाख रुपियाँ आर्थिक सहायता दिइनेछ र उनीहरूले छनोट गरेको कुनै पनि निजी अस्पतालमा निःशुल्क उपचारको सम्पूर्ण खर्च राज्य सरकारले वहन गर्नेछ। सीसीटीभी फुटेज राम्ररी जाँच भइरहेको र लापरवाहीका लागि कुनै पनि दोषीलाई छोडिने छैन भनी मुख्यमन्त्रीले चेताउनी दिएका छन्।
यस त्रासदीको बिचमा सरकारी स्वास्थ्य प्रणालीको अवस्था पनि प्रश्नको घेरामा आएको छ। कोलकाता मेडिकल कलेजमा उपचार गराइरहेका कनिष्ठ चिकित्सकहरूको एउटा वर्गले आधारभूत सुविधाहरूको अभावमा दुःख व्यक्त गरे। यति ठूलो र प्रख्यात मेडिकल कलेजमा आपतकालीन ट्रामा केयर सेन्टर नभएको र न्यूरोसर्जरी विभागको अवस्था निकै खराब रहेको जुनियर डाक्टरहरूको आरोप छ। उनीहरूले 7 देखि 8 जना गम्भीर बिरामीलाई निजी अस्पतालमा पुऱ्याउने स्वास्थ्यमन्त्रीको कदमप्रति पनि कडा आपत्ति जनाएका छन्। डाक्टरहरूले अधिकांश मृत्यु भीडको दबाउमा श्वासप्रश्वासका कारण भएको आशंका गरेका छन्।
यो हृदयविदारक घटनालाई लिएर देशभर शोकको लहर छ। प्रधानमन्त्री नरेन्द्र मोदी र केन्द्रिय गृहमन्त्री अमित शाहले सोसल मिडियामा दुर्घटनाप्रति गहिरो शोक व्यक्त गर्दै शोकाकुल परिवारप्रति समवेदना व्यक्त गर्दै घाइतेहरूको शीघ्र स्वास्थ्य लाभको कामना गरेका छन्। यसैबिच, बङ्गाल काङ्ग्रेसका अध्यक्ष शुभङ्कर सरकारले यस घटनाका लागि प्रशासनको लापरवाहीलाई दोष दिएका छन् र दोषीहरू विरुद्ध कडा कारबाहीको माग गरेका छन्। विपक्षीको आक्रमणको प्रतिवाद गर्दै मुख्यमन्त्रीले यस्तो संवेदनशील समयमा राजनीति गर्न नहुने बताए। उनले गत वर्ष पूजाको क्रममा बिजुलीको झटका लाग्दा 13 जनाको मृत्यु भएको र दार्जिलिङ आकस्मिक बाढी त्रासदीको पनि उल्लेख गरे। उनले विपक्षीलाई निशाना बनाउंदै यस समयमा सरकारको प्राथमिकता घाइतेहरूको उपचार र पीडितहरूलाई न्याय प्रदान गर्नु हो भनी बताए।
--------
हिन्दुस्थान समाचार / भवानी थामी
