गान्तोक, 19 अक्टोबर (हि.स.)। मुख्यमन्त्री प्रेमसिंह तामाङले प्रतिष्ठित उस्ताद बिस्मिल्लाह खाँ युवा पुरस्कारबाट सम्मानित सिक्किमकी दिलु तामाङ र तिला रूपा सपकोटालाई हार्दिक बधाई दिएका छन्।
मुख्यमन्त्री तामाङले आज सामाजिक सञ्जालमार्फत शुभकामना व्यक्त गर्दै सङ्गीत नाटक अकादमीद्वारा लोकनृत्य र नाटकको क्षेत्रमा पुर्याएको योगदानका लागि क्रमशः दिलु तामाङ र तिला रूपा सपकोटालाई उक्त पुरस्कार प्रदान गरिएकोमा खुशी व्यक्त गरेका छन्।
उनले यस राष्ट्रिय सम्मानलाई सिक्किमका लागि अत्यन्तै गौरवको क्षण बताउँदै कला र संस्कृतिप्रतिको समर्पणमार्फत राज्यको प्रतिष्ठा बढाउने प्रतिभाशाली छोरीहरूको उपलब्धिको प्रशंसा गरेका छन्।
मुख्यमन्त्रीले दुवै पुरस्कार विजेतालाई हार्दिक बधाई दिँदै उनीहरूको कलात्मक यात्रामा निरन्तर सफलता मिलोस् भन्ने कामना गरेका छन्।
उनले दुवै कलाकारको उपलब्धि सिक्किमको गौरव रहेको उल्लेख गर्दै उनीहरूको सफलता भावी पुस्ताका लागि प्रेरणाको स्रोत बन्ने विश्वाससमेत व्यक्त गरेका छन्।
---------------
हिन्दुस्थान समाचार / बिशाल
19 Oct 2026