गुवाहाटी, २५ अक्टोबर (हि.स.)। असमको सोनापुर स्थित सशस्त्र सीमा बल (एसएसबी) को प्रथम वाहिनीले आइतवार ‘फिट इन्डिया’ अभियान अन्तर्गत वाहिनी मुख्यालय र सबै कम्पनी एकाइहरूमा ‘सन्डे अन साइकल’ र्याली आयोजना गर्यो। बल मुख्यालयको निर्देश अनुसार वाहिनीका कमान्डेन्ट सुनील कौशिकको मार्गदर्शनमा कार्यक्रम आयोजना गरियो।

सोनापुर स्थित वाहिनी मुख्यालयमा कमान्डेन्टले हरियो झण्डा देखाएर साइकल र्यालीलाई प्रस्थान गराए। र्याली वाहिनी मुख्यालयबाट शुरु भई सोनापुरको न्यू मार्केटसम्म पुगेपछि पुनः मुख्यालय फर्कियो। यसै क्रममा वाहिनीका सबै कम्पनी एकाइहरूमा पनि साइकल र्याली आयोजना गरियो, जसमा अधिकारी तथा जवानहरूले उत्साहपूर्वक सहभागिता जनाए।

कार्यक्रमको मुख्य उद्देश्य नियमित व्यायाम र साइकल चलाउने बानीलाई प्रोत्साहन गर्नुका साथै स्वस्थ जीवनशैली र शारीरिक तन्दुरुस्तीप्रति सर्वसाधारणमा जागरूकता बढ़ाउनु थियो।

यसका साथै वाहिनी मुख्यालय र सबै कम्पनी एकाइहरूमा ‘स्वच्छता ही सेवा’ अभियान अन्तर्गत सरसफाइ कार्यक्रम पनि सञ्चालन गरियो। यस क्रममा र्यालीका मार्गहरू तथा वरपरका क्षेत्रहरूमा छरिएका फोहोर सङ्कलन गरी निर्धारित स्थानमा व्यवस्थापन गरियो। जवानहरूले पर्यावरण संरक्षण र आफ्नो वरपरको क्षेत्र सफा राख्नुपर्ने विषयमा पनि सर्वसाधारणलाई सचेत गराए।

कमान्डेन्ट कौशिकले कार्यक्रममा जवानहरूको सक्रिय सहभागिताको प्रशंसा गर्दै उनीहरूलाई नियमित व्यायाम गर्न र सरसफाइलाई आफ्नो दैनिक जीवनशैलीको अभिन्न हिस्सा बनाउन प्रोत्साहित गरे।

कार्यक्रमको समापन तन्दुरुस्ती, अनुशासन, सरसफाइ र वातावरण संरक्षणको सन्देश प्रवाह गर्दै गरियो।

/ बिशाल