प्रयागराज, २५ अक्टोबर (हि.स.)। लोकतन्त्रमा जनताले सरकार छान्छन्, तर अहिले यस्तो अवस्था सिर्जना गर्ने प्रयास भइरहेको छ, जहाँ सरकारले नै को मतदाता हुने भन्ने निर्णय गर्न थाल्नेछ। छत्तीसगढका पूर्वमुख्यमन्त्री भूपेश बघेलले आइतबार अलोपीबागस्थित सरदार पटेल सेवा संस्थानमा आयोजित कांग्रेसको सामाजिक न्याय र सहभागिता सम्मेलनलाई सम्बोधन गर्दै यस्तो बताएका हुन्। उनी कार्यक्रममा प्रमुख अतिथिका रूपमा सहभागी भएका थिए।

मतदाता सूचीबाट नाम हटाइएको आरोपप्रति चिन्ता व्यक्त गर्दै उनले मतदानको अधिकार सुरक्षित नरहे लोकतन्त्रको रक्षा पनि सुनिश्चित गर्न नसकिने बताए। जातीय जनगणना सामाजिक न्यायको दिशामा एउटा महत्त्वपूर्ण कदम भएको उल्लेख गर्दै उनले यसबाट समाजका सबै वर्गको वास्तविक सामाजिक, आर्थिक र शैक्षिक अवस्थाबारे जानकारी प्राप्त हुने र आवश्यकताअनुसार विकासका योजना बनाउन सकिने बताए।

बघेलले सामाजिक न्यायको उद्देश्य समाजका प्रत्येक वर्गलाई उचित अधिकार, समान अवसर र सम्मान प्रदान गर्नु रहेको बताए। यसका लागि विभिन्न वर्गको वास्तविक अवस्थाको मूल्याङ्कन गर्नु आवश्यक रहेको उनको भनाइ थियो। जातीय जनगणनाले कुन वर्ग सामाजिक, आर्थिक र शैक्षिक रूपमा कुन अवस्थामा छ तथा त्यसलाई विकासको मूलधारमा जोड्न कस्ता प्रयास आवश्यक छन् भन्ने कुरा पत्ता लगाउन सहयोग गर्ने उनले बताए।

उनले समाजका विभिन्न वर्गको वास्तविक अवस्थासम्बन्धी तथ्याङ्क सार्वजनिक नभएसम्म उनीहरूको आवश्यकता र विकासमा सहभागिताको सही मूल्याङ्कन गर्न कठिन हुने बताए। कांग्रेस नेता राहुल गान्धीले सामाजिक न्यायको मुद्दालाई नयाँ ढङ्गले उठाउँदै सबै वर्गलाई समानता र न्याय प्रदान गर्नुपर्ने आवश्यकतामा जोड दिएको पनि उनले उल्लेख गरे।

बघेलले नोभेम्बर १ मा दिल्लीमा आयोजना गर्ने प्रस्तावित कांग्रेसको ‘भोट बचाओ, देश बचाओ’ र्‍यालीको उल्लेख गर्दै मतदानको अधिकार लोकतन्त्रको सबैभन्दा ठूलो शक्ति रहेको बताए। मतदाता सूचीमा प्रत्येक योग्य नागरिकको नाम समावेश हुनु र उसले निर्भीक भएर मतदान गर्न पाउनु आवश्यक रहेको उनको भनाइ थियो। लोकतान्त्रिक व्यवस्थामा जनतालाई आफूले चाहेको सरकार छान्ने अधिकार रहेको उल्लेख गर्दै उनले यस अधिकारको रक्षा गर्न सबैजना सचेत हुनुपर्ने बताए।

सम्मेलनपछि बिजली घर चोकस्थित शंकरलाल मेमोरियल हलमा प्रयाग क्षेत्रको सङ्गठनात्मक बैठक आयोजना गरियो। बैठकमा प्रदेश प्रभारी र पार्टीका पदाधिकारीहरूले सङ्गठनका गतिविधि तथा तयारीको समीक्षा गरे।

कार्यक्रममा कांग्रेस विधायक दलका नेता वीरेन्द्र चौधरी, मनोज यादव, पूर्व विधायक विजय प्रकाश, देवेन्द्र निषाद, फुजैल हाशमी, मुकुन्द तिवारी, हसीब अहमद, सुधाकर तिवारी, हरिकेश त्रिपाठी, मनोज पासी, परवेज अन्सारी, विजय यादव, तलत अजीम, विजय मिश्रा, अंशुमान पटेल र राजनारायणलगायत ठूलो सङ्ख्यामा कांग्रेसका पदाधिकारी तथा कार्यकर्ताहरू उपस्थित थिए।

हिन्दुस्थान समाचार / बिशाल