कोकराझार (असम), २५ अक्टोबर (हि.स.)। गेलेफु माइन्डफुलनेस सिटीमा १०८ स्तूप स्थापना गर्ने कार्यक्रमलाई ध्यानमा राख्दै सुरक्षा व्यवस्था र आवागमनलाई सहज बनाउने विषयमा कोकराझार तथा चिराङ जिल्लाका प्रशासनिक अधिकारीहरूले छिमेकी देश भुटानको गृह मन्त्रालयअन्तर्गत कानुन तथा व्यवस्था विभागका महानिर्देशक पासाङ दोर्जीसँग आज बैठक गरेका छन्।

बैठकमा कोकराझारका जिल्ला आयुक्त पंकज चक्रवर्ती, बोडोल्यान्ड क्षेत्रीय जिल्ला (बीटीएडी) का पुलिस महानिरीक्षक (आईजीपी), कोकराझारका वरिष्ठ पुलिस अधिक्षक (एसएसपी) लगायत सम्बन्धित अधिकारीहरूको सहभागिता रहेको थियो। यस क्रममा गेलेफु माइन्डफुलनेस सिटीमा १०८ स्तूप स्थापना गर्ने कार्यक्रमसँग सम्बन्धित विभिन्न पक्षमा छलफल गरियो।

बैठकको छलफललाई छिमेकी जिल्ला चिराङसम्म विस्तार गरिएको थियो। उक्त छलफलमा चिराङका जिल्ला आयुक्त र वरिष्ठ पुलिस उपरीक्षक पनि सहभागी भए। प्रस्तावित कार्यक्रमका क्रममा दुवै जिल्लाबाट आवतजावत गर्ने भुटानी नागरिकहरूको सुरक्षा सुनिश्चित गर्नुका साथै उनीहरूको यात्रालाई सहज बनाउनु आवश्यक रहेकोमा अधिकारीहरूले जोड दिए।

उल्लेखनीय छ, उक्त कार्यक्रमका लागि ठूलो सङ्ख्यामा भुटानी नागरिकहरू यी जिल्लाहरू हुँदै यात्रा गर्ने सम्भावना छ। यस्तो अवस्थामा सम्बन्धित प्रशासनिक तथा प्रहरी अधिकारीहरूबीच समन्वय, सुरक्षा व्यवस्था र यातायात व्यवस्थापनका विषयमा भएको यस बैठकलाई महत्त्वपूर्ण मानिएको छ।

हिन्दुस्थान समाचार / बिशाल