नाम्ची, 06 अक्टूबर (हि.स.)। सिक्किममा जारी विशेष गहन पुनरीक्षण (एसआईआर) 2026 को निरन्तरतास्वरूप नाम्चीकी जिल्ला चुनाउ अधिकारी (डीईओ) अनुपा तामलिङले मङ्गलवार जिल्ला प्रशासनिक केन्द्र, नाम्चीमा चुनाउ पञ्जीकरण अधिकारी (ईआरओ) सँगको बैठकको अध्यक्षता गरेकी छन्।
बैठकको क्रममा डीईओले ईआरओहरूलाई भारतको चुनाउ आयोगद्वारा जारी गरिएका पछिल्ला निर्देशनबारे जानकारी गराइन् र एसआईआर प्रक्रियाको क्रममा छुटेका हुन सक्ने योग्य मतदाताहरूका लागि विशेष पञ्जीकरण अभियान सञ्चालन गर्न निर्देशन दिइन्।
उनले सही जानकारी जनतासम्म पुर्याउन र पञ्जीकरण प्रक्रियासम्बन्धी कुनै पनि भ्रम वा गलत बुझाइहरू निवारण गर्न हेतु अभियानअघि अधिकारी र सर्वसाधारणसँग प्रभावकारी सञ्चारको आवश्यकतामा जोड़ दिइन्।
डीईओले ईआरओहरूलाई दस्तावेजहरू सङ्कलन र प्रमाणीकरण गर्दा सम्बन्धित सहायक चुनाउ पञ्जीकरण अधिकारीहरू (एईआरओ ) र बुथ स्तरका अधिकारीहरू (बीएलओ) ले तोकिएका निर्देशिका र मापदण्डहरू कड़ाइका साथ पालना गर्ने सुनिश्चित गर्न पनि निर्देशन दिइन्।
उनले तोकिएको योग्यता मापदण्डअनुसार योग्य युवा मतदाताहरूलाई मतदाता नामावलीमा विधिवत समावेश गरिनुपर्ने कुरामा पनि जोड़ दिइन्।
बैठकमा ईआरओ (बर्फङ) सरन डी कालिकोटे, ईआरओ (10 पोकलोक-कामराङ) सुवास घिमिरे, ईआरओ (11 नाम्ची-सिङ्घिथाङ) वाङ्याल शेर्पासहित अन्यको उपस्थिति रहेको थियो।
---------------
हिन्दुस्थान समाचार / बिशाल
