
पटना, १३ नोभेम्बर (हि.स.)। बिहारको बिदुपुर-राघोपुर छह लेन गंगा पुल अब ‘नीतीश सेतु’ नामले चिनिने भएको छ। मुख्यमन्त्री सम्राट चौधरीले शुक्रवार सामाजिक सञ्जाल प्लेटफर्म एक्स मार्फत यसको घोषणा गरेका हुन्। उनले राज्य सरकारले पूर्व मुख्यमन्त्री नीतीश कुमारको सम्मानमा कच्ची दरगाह-राघोपुर-बिदुपुर छह लेन पुलको नाम ‘नीतीश सेतु’ राखेको जानकारी दिए। प्रधानमन्त्री नरेन्द्र मोदीले नोभेम्बर २१ मा बिहार भ्रमणका क्रममा यस पुललाई राष्ट्रलाई समर्पण गर्नेछन्।
मुख्यमन्त्रीले आफ्नो पोस्टमा प्रधानमन्त्री नोभेम्बर २१ मा बिहार आउने बताएका छन्। यस अवसरमा उनले ‘नीतीश सेतु’ को उद्घाटन गर्नेछन्। यसका साथै वैशाली जिल्लाको राजापाकरमा आयोजित कार्यक्रममा विभिन्न जनोपयोगी तथा विकास सम्बन्धी योजनाहरूको शिलान्यास एवं उद्घाटन पनि गर्नेछन्।
कच्ची दरगाह-बिदुपुर छह लेन पुल निर्माणमा ५ हजार करोड़ रुपियाँभन्दा बढ़ी खर्च गरिएको छ। यसका लागि बिहार सरकारले एशियाली विकास ब्याङ्क (एडीबी) बाट लगभग ३ हजार करोड़ रुपियाँ ऋण लिएको थियो भने लगभग २ हजार करोड़ रुपियाँ राज्य सरकारले आफ्नै स्रोतबाट खर्च गरेको छ।
यस पुल निर्माणको निर्णय साल २०१५ मा लिइएको थियो र साल २०१६ मा यसको शिलान्यास गरिएको थियो। परियोजना सम्पन्न हुन लगभग एक दशक लागेको छ। यसको चौड़ाइ ३२ मिटर रहेको छ र यसमा सवारीसाधन प्रतिघण्टा १०० किलोमिटरको गतिमा गुड्न सक्ने क्षमता निर्धारण गरिएको छ।
यो आधुनिक छह लेनको गंगा पुलले पटना जिल्लाको सबलपुरलाई वैशाली जिल्लाको बिदुपुरसँग राष्ट्रिय राजमार्ग-१०३ मार्फत जोड्नेछ। यसका साथै पटना-बख्तियारपुर बाइपास (एनएच-३०) सँग पनि यसको सीधा सम्पर्क हुनेछ।
पुल पूर्ण रूपमा सञ्चालनमा आएपछि पटना, वैशाली तथा उत्तर बिहारका अन्य क्षेत्रहरूबीच आवागमन अझ् तीव्र र सहज हुने अपेक्षा गरिएको छ। यसबाट सड़क सम्पर्क सुधार हुनुका साथै व्यापार, लगानी र आर्थिक गतिविधिलाई प्रोत्साहन मिल्नेछ। साथै यस क्षेत्रमा रोजगारीका नयाँ अवसरहरू सिर्जना हुने सम्भावना पनि रहेको छ।
/ बिशाल