
नयाँ दिल्ली, १५ नोभेम्बर (हि.स.)। देशको सार्वजनिक प्रसारक संस्था ‘प्रसार भारती’ ले लेखिका, पुरस्कार विजेता पटकथा लेखक तथा स्तम्भकार अद्वैता कालालाई आफ्नो प्रधान सल्लाहकार नियुक्त गरेको छ। मूल रूपमा उत्तराखण्डको पौडी गढवाल जिल्लास्थित सुमाडी गाउँकी अद्वैता कालले साहित्य, सिनेमा तथा पत्रकारिताको क्षेत्रमा राष्ट्रिय र अन्तर्राष्ट्रिय स्तरमा आफ्नो विशिष्ट पहिचान स्थापित गरेकी छन्।
काल मुख्य रूपमा विद्या बालन अभिनीत चर्चित हिन्दी चलचित्र ‘कहानी’ को पटकथा लेखनका लागि परिचित छन्। यस चलचित्रका लागि उनलाई ‘स्क्रिन अवार्ड’ तथा ‘जी सिने अवार्ड’ लगायत विभिन्न प्रतिष्ठित पुरस्कारबाट सम्मानित गरिएको थियो। यसबाहेक, उनको उपन्यास ‘अलमोस्ट सिङ्गल’ सर्वाधिक बिक्री हुने पुस्तकहरूमध्ये एक बनेको थियो। उक्त पुस्तक अमेरिका र फ्रान्सलगायत देशहरूमा समेत प्रकाशित भएको छ।
साहित्य र सिनेमाका अतिरिक्त उनी सक्रिय स्तम्भकार तथा राजनीतिक-सामाजिक विश्लेषक पनि हुन्। उनले विभिन्न राष्ट्रिय समाचारपत्र तथा टेलिभिजन माध्यममार्फत समसामयिक विषयहरूमा नियमित रूपमा आफ्ना विचार प्रस्तुत गर्दै आएकी छन्।
राष्ट्रिय तथा अन्तर्राष्ट्रिय मञ्चहरूमा सफलता हासिल गरे पनि अद्वैता कालको आफ्नो जन्मभूमिसँग गहिरो सम्बन्ध रहँदै आएको छ।
विश्वव्यापी कोरोना महामारीका क्रममा उनले ‘प्रोजेक्ट भुली’ नामक पहलमार्फत पौडी गढवालका विभिन्न गाउँ तथा स्थानीय समुदायसम्म राहत र सहयोग पुर्याउन महत्त्वपूर्ण भूमिका निर्वाह गरेकी थिइन्।
प्रसार भारतीमा उनको नियुक्तिलाई साहित्य, सिनेमा, पत्रकारिता तथा जनसञ्चार क्षेत्रमा रहेको उनको व्यापक अनुभवको उपयोग गर्ने महत्त्वपूर्ण कदमका रूपमा हेरिएको छ।
हिन्दुस्थान समाचार / भवानी थामी