
फतेहपुर, १६ नोभेम्बर (हि.स.)। उत्तर प्रदेशको फतेहपुर जिल्लामा सोमवार कब्रिस्तानमा अज्ञात महिलाको नग्न अवस्थामा शव फेला परेपछि क्षेत्रमा सनसनी फैलिएको छ। स्थानीय ग्रामीणहरू अनुसार, शव लगभग तीनदेखि चार दिन पुरानो रहेको अनुमान गरिएको छ।
औंग थाना क्षेत्र अन्तर्गत आशापुर गाउँका निवासी छोटू आफ्नो खेतमा सिँचाइका लागि पाइपलाइन बिछ्याउँदै थिए। यसै क्रममा उनको नजर कब्रिस्तानको जङ्गलमा रहेको महिलाको शवमाथि परेको थियो। शव देखेपछि किसानले आत्तिएर तत्काल गाउँ पुगे र ग्रामीणहरूलाई घटनाबारे जानकारी गराए।
सूचना प्राप्त हुनासाथ ठूलो सङ्ख्यामा ग्रामीणहरू घटनास्थलमा पुगे। उनीहरूले शवको पहिचान गर्ने प्रयास गरे पनि महिलाको पहिचान हुन सकेन।
घटनाको सूचना पाएपछि घटनास्थल पुगेका औंग थानाध्यक्ष दिनेश कुमार शुक्लाले घटनास्थलको निरीक्षण गरी अनुसन्धान तथा छानबिन भइरहेको बताए। हाल महिलाको पहिचान र मृत्युको कारण पत्ता लगाउने प्रयास भइरहेको छ।
हिन्दुस्थान समाचार / भवानी थामी