
गान्तोक, १८ नोभेम्बर (हि.स.)। सिक्किमको मत्स्यपालन क्षेत्रलाई थप सुदृढ बनाउने दिशामा महत्त्वपूर्ण पहल गर्दै राज्य सरकारको मत्स्यपालन विभागले प्रधानमन्त्री मत्स्य सम्पदा योजना (पीएमएमएसवाई) अन्तर्गत सोरेङ जिल्लाको रोथकस्थित कार्प माछा फार्मलाई पुनर्जीवित गरी अमुर कार्प ब्रुड ब्याङ्कका रूपमा स्तरोन्नति गरेको छ। स्तरोन्नति गरिएको उक्त केन्द्रको उद्घाटन आज सालघारी-जूम निर्वाचन क्षेत्रका विधायक मदन सिन्चुरीले गरेका छन्।
कार्यक्रमलाई सम्बोधन गर्दै विधायक सिन्चुरीले यस परियोजनालाई राज्यकै एक विशिष्ट पहलका रूपमा वर्णन गरे। उनले यसको सफल कार्यान्वयन तथा दीर्घकालीन सञ्चालनका लागि सबै सरोकारवालालाई सामूहिक जिम्मेवारी निर्वाह गर्न आग्रह गरे। साथै, युवाहरूलाई मत्स्यपालन क्षेत्रमा सहभागी हुन प्रोत्साहित गर्दै माछापालकहरूका लागि बजारको पहुँच विस्तार गर्न विभागलाई आग्रह गरे।
उनले यस उद्घाटनले वैज्ञानिक तथा दिगो माछापालन अभ्यासमार्फत मत्स्यपालन क्षेत्रको सुदृढीकरण, आत्मनिर्भरता प्रवर्द्धन तथा ग्रामीण समुदायको आर्थिक अवस्था सुधार गर्ने राज्य सरकारको प्रतिबद्धता प्रतिबिम्बित गरेको बताए। उनले नवनिर्मित पूर्वाधारबारे स्थानीय जनप्रतिनिधिमूलक निकायहरूले जनचेतना फैलाउनुपर्ने र सर्वसाधारणलाई केन्द्रको भ्रमण गरी आधुनिक माछापालन प्रविधिबारे जानकारी लिन प्रोत्साहित गर्नुपर्नेमा पनि जोड दिए। उनले यस परियोजनालाई सफल बनाउन योगदान पुर्याउने विभाग तथा सबै सम्बन्धित पक्षलाई बधाई दिए।
मत्स्यपालन विभागकी सचिव रोशनी राईले पनि कार्यक्रमलाई सम्बोधन गर्दै प्रधानमन्त्री मत्स्य सम्पदा योजनाअन्तर्गत सञ्चालित यस परियोजनाको महत्त्वमाथि प्रकाश पारिन्। उनले यसलाई राज्यकै एक विशिष्ट पहल बताउँदै माछापालक तथा अन्य सरोकारवालाहरूलाई ब्रुड ब्याङ्कमा उपलब्ध सुविधाहरूको पूर्ण उपयोग गर्न आग्रह गरिन्। साथै, स्थानीय निकायहरूलाई यसबारे जनचेतना फैलाउन तथा विद्यालयहरूलाई विद्यार्थीका लागि शैक्षिक भ्रमण आयोजना गर्न प्रोत्साहित गर्न आग्रह गरिन्, ताकि विद्यार्थीहरूले माछापालनसम्बन्धी व्यावहारिक ज्ञान हासिल गर्न सकून्।
उनले सोरेङ जिल्लालाई जैविक मत्स्यपालन समूह क्षेत्रका रूपमा घोषणा गरिएको जानकारी दिँदै नवनिर्मित पूर्वाधार विशेषगरी अमुर कार्प माछाको प्रवर्द्धनमा केन्द्रित रहेको बताइन्। यस परियोजनाको सम्भावनाप्रति आशावादी रहँदै उनले उक्त केन्द्र जिल्लाभित्र मात्र नभई अन्य क्षेत्रहरूमा समेत मत्स्यपालन विकासको सक्रिय केन्द्रका रूपमा स्थापित हुने विश्वास व्यक्त गरिन्।
यसै क्रममा उनले आगामी २१ नोभेम्बरमा मनाइने विश्व मत्स्यपालन दिवसबारे जानकारी दिँदै उक्त अवसरमा विभागले जिल्लाभरि सञ्चालन गरिरहेका विभिन्न गतिविधिबारे पनि अवगत गराइन्।
विधायक सिन्चुरीले अन्य विशिष्ट व्यक्तिहरूसँगै केन्द्रको निरीक्षण गर्दै मत्स्यपालन विभागका अधिकारी तथा कर्मचारीहरूसँग अन्तरक्रिया गरेका थिए।
हिन्दुस्थान समाचार / बिशाल