अमरावती (आन्ध्र प्रदेश)/नयाँ दिल्ली, ०३ नोभेम्बर (हि.स.)। भीषण चक्रवाती आँधी ‘मुरासु’ ले तटीय आन्ध्र प्रदेशमा ठूलो क्षति पुर्याएको छ। आज बिहान चक्रवात तटसँग ठोक्किँदा हजारौँ रुख ढलेका छन्। विद्युतका सयौँ खम्बा क्षतिग्रस्त भएका छन् भने माछा मार्ने डुङ्गाहरू नष्ट भएका छन्। केन्द्रिय गृह एवं सहकारितामन्त्री अमित शाहले मुख्यमन्त्री एन. चन्द्रबाबु नायडूलाई फोन गरी चक्रवात ‘मुरासु’ को प्रभाव, यसबाट भएको क्षति र राज्य सरकारले सञ्चालन गरिरहेका राहत कार्यबारे जानकारी लिएका छन्।

आन्ध्र प्रदेशका मुख्यमन्त्री चन्द्रबाबु नायडूले अधिकारीहरूलाई चक्रवात प्रभावित क्षेत्रका मानिसहरू सडकमा ननिस्कने व्यवस्था सुनिश्चित गर्न निर्देशन दिएका छन्। साथै, उनले जनधनको क्षति रोक्न र सम्पत्तिमा हुने नोक्सानी कम गर्न आवश्यक सबै सतर्कतामूलक कदम चाल्न पनि निर्देशन दिएका छन्। अहिले पुलिसकर्मीहरू सडकमा गस्ती गरिरहेका छन् र चक्रवात ‘मुरासु’ लाई ध्यानमा राख्दै मानिसहरूलाई घरभित्रै बस्न आग्रह गरिरहेका छन्।

बापटला र प्रकाशमसहित कैयौँ जिल्लामा भारी वर्षा भएको छ। यसका कारण बालीमा ठूलो क्षति पुगेको छ भने धेरै क्षेत्र जलमग्न भएका छन्। दूरभाष सम्मेलनका क्रममा मुख्यमन्त्री एन. चन्द्रबाबु नायडूले विद्युतका खम्बा र उपकेन्द्रहरूको अवस्थाबारे जानकारी लिएका छन्। अर्कोतर्फ, प्रकाशम जिल्लाको ओङ्गोलमा चक्रवात ‘मुरासु’ का कारण भएको भारी वर्षा र तीव्र हावाहुरीले धेरै कच्ची घरहरू भत्किएका छन् र त्यहाँ बसोबास गर्ने मानिसहरू फसेका छन्। फसेका मानिसहरूलाई सुरक्षित रूपमा बाहिर निकाल्न जिल्ला प्रशासनले उद्धार अभियान शुरु गरेको छ। ओङ्गोलस्थित प्रकाशम जिल्ला कलेक्ट्रेट परिसरमा रहेको ‘आन्ध्र केसरी’ तङ्गुतुरी प्रकाशम पन्तुलुको सालिकमाथि भारी वर्षा र तीव्र हावाहुरीका कारण एउटा ठूलो रुख ढलेको छ, जसबाट सालिक क्षतिग्रस्त भएको छ।

यसैबीच, केन्द्रिय गृहमन्त्री शाहले मुख्यमन्त्री एन. चन्द्रबाबु नायडूसँग कुराकानी गरेका छन्। मुख्यमन्त्रीले केन्द्रिय मन्त्रीलाई यसअघि आएको चक्रवात ‘अर्णव’ र ‘मुरासु’ का कारण उत्पन्न अवस्थाबारे जानकारी गराएका छन्। उनले विभिन्न जिल्लामा बाली तथा सम्पत्तिमा पुगेको क्षतिको विस्तृत विवरण पनि प्रस्तुत गरेका छन्। क्षतिको मूल्याङ्कन गर्न केन्द्रबाट टोली पठाएकोमा उनले मोदी सरकारप्रति आभार व्यक्त गरेका छन्। नायडूले यी विपत्तिबाट राज्यलाई पुनः सामान्य अवस्थामा फर्काउन आवश्यक सहयोग उपलब्ध गराउन केन्द्र सरकारसँग आग्रह गरेका छन्।

हिन्दुस्थान समाचार / भवानी थामी