कोलकाता, ०6 नोभेम्बर (हि.स.): पश्चिम बङ्गालमा वर्षाको मौसम समाप्त भएपछि चिसोको प्रभाव बिस्तारै बढ्न थालेको छ। शुक्रवार राज्यका अधिकांश जिल्लाहरूमा सुख्खा मौसम अनि सफा आकाश रहने अनुमान गरिएको छ। दक्षिण बङ्गालदेखि उत्तर बङ्गालसम्मै दिउँसो घामिलो रहने सम्भावना छ। यद्यपि, बिहान-बेलुकी हल्का चिसो अनुभूति हुनसक्छ।

अलिपुर मौसम विज्ञान विभाग (क्षेत्रीय मौसम विज्ञान केन्द्र, कोलकाता)- को पूर्वानुमान अनुसार शुक्रवार कोलकाता, हावडा, हुगली, उत्तर 24 परगना, दक्षिण 24 परगना, पूर्व मेदिनीपुर, पश्चिम मेदिनीपुर, झारग्राम, बाँकुड़ा, पुरुलिया, पश्चिम बर्दवान तथा पूर्वी बर्दवान सहित दक्षिण बङ्गालका सबै जिल्लाहरूमा मौसम मुख्यतया सुख्खा रहने सम्भावना छ। अहिलेघरि वर्षाको लागि कुनै विशेष चेताउनी छैन।

शुक्रवार कोलकातामा अधिकतम तापक्रम 30-31 डिग्री सेल्सियस र न्यूनतम 21-22 डिग्री सेल्सियस लगभग रहने अनुमान गरिएको छ। बिहान हल्का कुहिरो लाग्नसक्छ जबकि दिन बढ्दै जाँदा आकाश सफा र घामिलो रहने सम्भावना छ।

उत्तर बङ्गालको दार्जीलिङ, कालेबुङ, जलपाईगुडी, अलिपुरद्वार, कुचबिहार, उत्तर दिनाजपुर, दक्षिण दिनाजपुर र मालदा जिल्लामा पनि सुख्खा मौसम रहने अनुमान गरिएको छ। रातको तापक्रम घटेको कारण पहाड़ी क्षेत्रमा चिसोको प्रभाव बढ़ी महसूस गर्न सकिन्छ।

मौसम विभागको पूर्वानुमान अनुसार आगामी तीन-चार दिनमा राज्यका विभिन्न भागमा न्यूनतम तापक्रम क्रमशः तीनदेखि चार डिग्री सेल्सियस घट्ने सम्भावना छ। उत्तर-पश्चिमी हावाको प्रभावले बिहान र राती चिसो बढ्ने सम्भावना छ। मौसममा आएको यो परिवर्तनले राज्यमा जाड़ो आउने सङ्केत दिरहेको छ।

हाल सप्ताहन्तसम्म राज्यका अधिकांश भागहरूमा मौसम सुख्खा रहने सम्भावना छ। यद्यपि नोभेम्बर 9 र 10 वरपर दक्षिण बङ्गालका केही जिल्लाहरूमा आंशिक बादल रहने सम्भावना छ। मौसम विभागले जारी गरेको आगामी पूर्वानुमानको पनि निगरानी भइरहेको छ।

--------

हिन्दुस्थान समाचार / उष्णता छेत्री शर्मा