नयाँ दिल्ली, ०६ नोभेम्बर (हि.स.)। उपराष्ट्रपति सीपी राधाकृष्णन, प्रधानमन्त्री नरेन्द्र मोदी तथा रक्षामन्त्री राजनाथ सिंहलगायत विभिन्न नेताहरूले शुक्रबार देशवासीलाई धनतेरसको शुभकामना दिएका छन्।

उपराष्ट्रपति सीपी राधाकृष्णनले सामाजिक सञ्जाल एक्समा लेखेका छन्, “तपाईंहरू सबैलाई धनतेरसको हार्दिक शुभकामना। भगवान् धन्वन्तरीको कृपाले सबैको जीवनमा सुख, उत्तम स्वास्थ्य, समृद्धि र खुसीयाली कायम रहोस्। तपाईंहरू सबैको उज्ज्वल भविष्यको कामना गर्दछु।”

प्रधानमन्त्री नरेन्द्र मोदीले भगवान् धन्वन्तरीको दिव्य कृपाले सबैको जीवन सधैँ सुख, शान्ति र उत्तम स्वास्थ्यले आलोकित रहोस् भन्ने कामना गरेका छन्। प्रत्येक परिवारमा उत्साह र आनन्दको अखण्ड दीप प्रज्वलित भइरहोस् भन्ने उनको मंगलकामना छ। उनले संस्कृतको एउटा श्लोक साझा गर्दै लेखेका छन्,

नमामि धन्वन्तरिमादिदेवं सुरासुरैर्वन्दितपादपद्मम्। लोके जरारुग्भयमृत्युनाशं दातारमीशं विविधौषधीनाम्॥

लोकसभा अध्यक्ष ओम बिरलाले भगवान् धन्वन्तरीको कृपाले सबैलाई उत्तम स्वास्थ्य र दीर्घायु प्राप्त होस् तथा माता लक्ष्मीको आशीर्वादले प्रत्येक घरमा सुख, शान्ति र समृद्धिको वास होस् भन्ने कामना गरेका छन्। उनले यस धनतेरसमा सरसफाइ, पर्यावरण संरक्षण, सामाजिक सद्भाव र सामूहिक उन्नतिलाई जीवनको हिस्सा बनाउने सङ्कल्प गर्न पनि आह्वान गरेका छन्।

रक्षामन्त्री राजनाथ सिंहले भगवान् श्री धन्वन्तरी र माता लक्ष्मीको असीम कृपाले सबैको जीवनमा आरोग्य, सुख, शान्ति र समृद्धिको वास होस् तथा खुसीयाली र सौभाग्यको आगमन होस् भन्ने कामना गरेका छन्। यस पवित्र पर्वले सबैको जीवनलाई नयाँ ऊर्जा र सकारात्मकताले आलोकित गरोस् भन्ने उनको मंगलकामना छ।

केन्द्रिय गृहमन्त्री तथा सहकारितामन्त्री अमित शाहले भगवान् धन्वन्तरीले सबैलाई सुख, समृद्धि र उत्तम स्वास्थ्य प्रदान गरून् भन्ने कामना गरेका छन्। केन्द्रिय स्वास्थ्यमन्त्री जेपी नड्डाले भगवान् धन्वन्तरी र माता लक्ष्मीसँग सबैको जीवनमा सधैँ सुख, शान्ति, उत्तम स्वास्थ्य र समृद्धि कायम रहोस् भनी प्रार्थना गरेका छन्।

भारतीय जनता पार्टी (भाजपा) का राष्ट्रिय अध्यक्ष नितिन नवीनले आरोग्यका देवता भगवान् धन्वन्तरीको आराधना गरिने यस पवित्र पर्वले सबैको जीवनमा उत्तम स्वास्थ्य, सुख र सौभाग्य ल्याओस् तथा माता लक्ष्मीको कृपाले प्रत्येक घर धनधान्य र समृद्धिले परिपूर्ण रहोस् भन्ने कामना गरेका छन्। यस अवसरमा प्रधानमन्त्री नरेन्द्र मोदीको ‘स्थानीय उत्पादनका लागि आवाज’ भन्ने आह्वानलाई आत्मसात् गर्दै स्थानीय कारीगर तथा साना व्यापारीबाट सामान खरिद गर्न उनले आग्रह गरेका छन्, ताकि उनीहरूको घरमा पनि खुशीका दीप प्रज्वलित हुन सकून्।

केन्द्रिय कृषिमन्त्री तथा किसान कल्याणमन्त्री शिवराज सिंह चौहानले भगवान् धन्वन्तरीले सबैलाई स्वास्थ्यरूपी धन प्रदान गरून् र माता लक्ष्मीले घरआँगनलाई सुख, समृद्धि, धनधान्य तथा वैभवले परिपूर्ण बनाऊन् भन्ने कामना गरेका छन्। सबैका मनोकामना पूरा होऊन् भन्ने उनको प्रार्थना छ।

लोकसभामा विपक्षी दलका नेता राहुल गान्धीले आरोग्य, सम्पत्ति र वैभवको पर्व धनतेरसले सबैको जीवनमा सुख, समृद्धि र खुसीयाली ल्याओस् भन्ने शुभकामना दिएका छन्। कांग्रेस महासचिव प्रियङ्का गान्धी वाड्राले यस पवित्र पर्वले सबैको जीवनमा धेरै खुशी ल्याओस् तथा माता लक्ष्मी र भगवान् धन्वन्तरीले सबैको कल्याण गरून् भन्ने कामना गरेकी छन्। कांग्रेसका राष्ट्रिय अध्यक्ष मल्लिकार्जुन खरगेले माता लक्ष्मीको कृपाले सबैको जीवनमा उत्तम स्वास्थ्य, सुख, समृद्धि र खुसीयालीको वास होस् भन्ने कामना गरेका छन्।

हिन्दुस्थान समाचार / भवानी थामी