नाम्ची, 06 नोभेम्बर (हि.स.)। सारथी 1.0’ (टाइटन कम्पनी लिमिटेडद्वारा समर्थित) ले नाम्ची जिल्लामा शिक्षकहरूका लागि एकदिने प्रशिक्षण कार्यक्रम (दोस्रो ब्याच) सफलतापूर्वक आयोजना गरेको छ। यस कार्यक्रममा 23 माध्यमिक तथा उच्च माध्यमिक विद्यालयहरूका 41 जना शिक्षकको सहभागिता रहेको थियो।

उक्त कार्यक्रमको मुख्य उद्देश्य ‘लागुऔषध तथा दुर्व्यसनमुक्त’ र ‘मानसिक रूपमा स्वस्थ’ सिक्किम निर्माणका लागि विद्यालयस्तरमा भइरहेका प्रयासहरूलाई अझ सुदृढ़ बनाउनु रहेको थियो। यो पहल मुख्यमन्त्री पीएस गोलेको लागुऔषध तथा दुर्व्यसनमुक्त र मानसिक रूपमा स्वस्थ समाज निर्माण गर्ने परिकल्पनासँग मेल खान्छ। यस कार्यमा मुख्यमन्त्रीका सल्लाहकार तथा सारथी 1.0 का प्रमुख स्रोतवक्ता रोहित राज महाराजको मार्गदर्शन रहेको छ।

परियोजना निर्देशक विशाल शर्माले यस पहलको परिचय दिँदै विद्यार्थी तथा शिक्षकहरूमाझ देखिने लागुपदार्थको दुरुपयोग र दुर्व्यसनका विषयमा अन्तरक्रियात्मक छलफल गराए। शिक्षकहरूले विद्यार्थीको व्यवहार, अनुशासन, बाल संरक्षण अधिकार तथा आजको पुस्ताका विद्यार्थीहरूलाई सम्हाल्दा आइपर्ने जटिलताबारे आफ्ना अनुभव र चुनौतीहरू साझा गरे।

दिवाभोजपछि, सितार वादनमा विशेष दक्षता राख्ने सङ्गीतमा विद्यावारिधि गरेका डा. शुभम पिटर गजमेरले साङ्गीतिक प्रस्तुतिमार्फत कार्यक्रमलाई अझ जीवन्त बनाए।

त्यसपछि जिल्ला संयोजकले यसअघि तालिमप्राप्त सारथी क्लबहरूद्वारा सञ्चालित सफल गतिविधिहरूको जानकारी दिए र सहभागी विद्यालयहरूलाई पनि यस्तै प्रकारका पहलअघि बढ़ाउन प्रोत्साहित गरे।

परियोजना निर्देशकले सारथी 1.0 का उद्देश्य, मार्गदर्शक सिद्धान्त र उपलब्धिबारे विस्तृत जानकारी दिए साथै उनले विद्यार्थी तथा सर्वसाधारणका लागि उपलब्ध विभिन्न सरकारी योजना र कल्याणकारी पहलबारे पनि प्रकाश पारे।

कार्यक्रमको अन्तमा सहभागीहरूलाई प्रमाण-पत्र र सारथी क्लबका ब्यानरहरू वितरण गरियो। यसले सहभागी विद्यालयहरूको तर्फबाट यस पहललाई निरन्तरता दिने तथा विद्यार्थीहरूका लागि अझ सुरक्षित, स्वस्थ र सहयोगी शिक्षण वातावरण सिर्जना गर्ने प्रतिबद्धतालाई थप बलियो बनाएको छ।

---------------

हिन्दुस्थान समाचार / बिशाल