पाकिम, 06 नोभेम्बर (हि.स.)। पाकिम जिल्लाको नाथाङ-माछोङ निर्वाचन क्षेत्रअन्तर्गत पारखामा शुक्रवार सिक्किम गरीब आवास योजना (एसजीएवाई) मार्फत निर्माण गरिएका आठवटा घरको उद्घाटन गरिएको छ। सामाजिक कल्याण विभाग तथा महिला, बालकबालिका, ज्येष्ठ नागरिक तथा दिव्याङ्ग कल्याण विभागकी सल्लाहकार एवं विधायक पामिन लेप्चाले उक्त घरहरूको उद्घाटन गरिन्।
उद्घाटन समारोहमा जिल्ला अध्यक्ष लाडेन ल्हमु भोटिया, विधायकका विशेष कर्तव्य अधिकारी एमबी गुरुङ, पारखा खण्डअन्तर्गत तीनवटै ग्राम पञ्चायत एकाइ (जीपीयू)-का पञ्चायत अध्यक्ष तथा सदस्य, पारखाका खण्ड विकास अधिकारी केबल शर्मा, पारखाका एई राजकुमार निरौलाका साथै विभिन्न विभागका अधिकारीगण, स्थानीय बासिन्दा र लाभग्राहीहरूको उपस्थिति रहेको थियो।
सिक्किम गरीब आवास योजना’ (एसजीएवाई) राज्य सरकारको एक आवास पहल हो, जसको उद्देश्य आर्थिक रूपमा विपन्न र योग्य परिवारहरूलाई सुरक्षित तथा मर्यादित आवास उपलब्ध गराउनु हो। यस योजनाले स्थायी घरमा पहुँच सुनिश्चित गर्दै जीवनस्तर सुधार्ने, आवास सुरक्षालाई बलियो बनाउने र तल्लो तहसम्म सामाजिक कल्याणलाई प्रवर्द्धन गर्ने लक्ष्य राखेको छ।
ती आठ घरको उद्घाटन राज्य सरकारद्वारा चालिएको एउटा महत्त्वपूर्ण कदम हो, जसले लाभग्राही परिवारहरूलाई सुध्रिएको जीवनस्तर र सुरक्षित वासस्थान प्रदान गरी उनीहरूको आकाङ्क्षा पूरा गर्न मद्दत पुर्याउँछ।
---------------
हिन्दुस्थान समाचार / बिशाल
06 Nov 2026
