गान्तोक, 08 मार्च (हि.स.)। भारतीय जनता पार्टी (भाजपा) सिक्किम महिला मोर्चाले आज सिङतामस्थित राज्य पार्टी कार्यालयमा अन्तरराष्ट्रिय महिला दिवस उत्सव आयोजना गर्यो। कार्यक्रममा खादी बोर्डकी पूर्व मार्केटिङ तथा विकास अधिकारी एवं सफल उद्यमी दिलमाया सुब्बा मुख्य अतिथिका रूपमा उपस्थित थिइन्। यसैगरी, प्रदेश भाजपा अध्यक्ष डीआर थापा, महिला मोर्चा अध्यक्ष सृजना छेत्री लगायत अन्यहरू पनि उपस्थित थिए।
कार्यक्रममा महिला मोर्चाले उत्कृष्ट उपलब्धि र योगदानका लागि चार प्रेरणादायी महिलाहरूलाई सम्मान जनायो। उनीहरूमा पर्वतारोही नेहा राई, प्रतिबद्ध आशा कार्यकर्ता दिलमाया लिम्बू र भीममाया गुरुङ तथा सफल उद्यमी दिलमाया सुब्बा सामेल छन्। यसै क्रममा महिला मोर्चाले प्रधानमन्त्री उज्ज्वला योजना अन्तर्गत लगभग एक सय महिला लाभार्थीहरूलाई निःशुल्क एलपीजी कनेक्सन वितरण गर्यो।
कार्यक्रमलाई सम्बोधन गर्दै प्रदेश अध्यक्ष डीआर थापा र महिला मोर्चा अध्यक्ष सृजना छेत्रीले महिला कल्याण र सशक्तिकरणका लागि मोदी सरकारले शुरु गरेका विभिन्न योजनाहरूमाथि प्रकाश पारे। उनीहरूले यी पहलहरूले कसरी जीवन परिवर्तन गरिरहेका छन् भन्ने बारेमा बताए र सबै महिलाहरूलाई आफ्नो अधिकारको लागि उभिन, आर्थिक रूपमा स्वतन्त्र बन्न तथा बलियो र समावेशी समाज निर्माणमा सक्रिय भाग लिन आग्रह गरे।
मुख्य अतिथि सुब्बाले आफ्नो प्रेरणादायी सम्बोधनमा आफ्ना जीवनका अनुभवहरू साझा गरिन्। उनले उपस्थित महिलाहरूलाई आफ्नो हकका लागि लड्न, आर्थिक स्वतन्त्रता प्राप्त गर्न तथा मर्यादा र सम्मानले भरिपूर्ण जीवन बिताउन प्रेरित गरिन्।
यस अवसरमा रंगारंग सांस्कृतिक कार्यक्रम पनि प्रस्तुत गरिएको प्रेस विज्ञप्तिमा उल्लेख छ। भाजपा सिक्किम महिला मोर्चाले हरेक भागमा महिलाहरूको उत्थानको लागि काम गर्न पूर्ण रूपमा प्रतिबद्ध रहेको बताएको छ।
हिन्दुस्थान समाचार / बिशाल
