गान्तोक, 11 जून (हि.स.)। इन्सिच्युट फर् ट्रान्सफर्मिङ सिक्किम (आईटीएस) का उपाध्यक्ष चन्द्रप्रकाश शर्माको अगुवाईमा एक टोलीले आज नाम्ची जिल्लाका विभिन्न प्रमुख संस्थानहरूको भ्रमण गऱ्यो। टोलीमा आईटीएसका सदस्य डा. नीरज अधिकारी र जेम्स शेरिङ लेप्चा पनि सामेल थिए।
आईटीएसका अनुसार, टोलीले लागूपदार्थ निवारण एवं पुनर्वास केन्द्र, औद्योगिक प्रशिक्षण संस्थान, नाम्ची र किचुडुम्रास्थित जैविक विविधता पार्कको भ्रमण गर्यो। भ्रमणको उद्देश्य यी संस्थानहरूको कार्यप्रणालीको मूल्याङ्कन गर्नु, चुनौतीहरू बुझ्नु, उपयुक्त नीतिगत हस्तक्षेप र संस्थागत सहयोग मार्फत सम्भाव्य समाधानहरू खोज्नु थियो।
भ्रमणको क्रममा उपाध्यक्ष र सदस्यहरूले विद्यमान अवस्था र विकास आवश्यकताहरूको बारेमा प्रत्यक्ष जानकारी प्राप्त गर्न सरोकारवालाहरू, अधिकारीहरू, कर्मचारीहरू र विद्यार्थीहरूसँग अन्तरक्रिया गरे। टोलीले संस्थानका पूर्वाधार, चलिरहेका गतिविधिहरू र कामकाजसॅंग सम्बन्धित विषयहरूको पनि समीक्षा गर्यो र सेवा वितरणलाई सुदृढ पार्न र संस्थागत कार्यसम्पादन बढाउन प्रभावकारी उपायहरूको आवश्यकतामा जोड दियो।
यो भ्रमण सिक्किममा समावेशी र दिगो विकासको सरकारको दृष्टिकोणलाई समर्थन गर्न र जमिन स्तरका चुनौतीहरू पहिचान गरी संस्थान र समुदायहरूसँग प्रत्यक्ष संलग्न हुने संस्थानको निरन्तर प्रयासको एक हिस्सा रहेको बताइएको छ।
हिन्दुस्थान समाचार / बिशाल
