अलीपुरद्वार, 18 जून (हि.स.)। जिल्लामा एक जना व्यक्तिले आफ्नी पत्नीको निर्मम हत्या गरी आत्महत्या गर्ने प्रयास गरेको घटना प्रकाशमा आएको छ। घटना बिहिवार बिहान सबेरै अलिपुरद्वार नम्बर 1 ब्लकको शालकुमार 2 ग्राम पञ्चायतको कोलाबाडिया गाउँमा भएको हो। मृतकको पहिचान धनबाला राय अधिकारीको रूपमा गरिएको छ।
रिपोर्ट अनुसार, अभियुक्त पति अचिन्त्य अधिकारीले आफ्नी पत्नीलाई धारिलो हतियारले आक्रमण गरे। उनले पत्नी घाँटी रेटेर टाउको र अनुहारमा धेरै प्रहार गरे, जसको परिणामस्वरूप पत्नीको घटनास्थलमै मृत्यु भयो। यो जघन्य अपराध गरेपछि आरोपी घटनास्थलबाट भागेनन् बरु आफैलाई धारिलो हतियारले आक्रमण गरेर आत्महत्या गर्ने प्रयास गरे। घटनाको जानकारी पाएपछि सोनापुर चौकीबाट पुलिस घटनास्थलमा पुगेर शव कब्जामा लिएर पोस्टमार्टमको लागि जिल्ला अस्पताल पठाएको छ। गम्भीर घाइते अभियुक्त अचिन्त्य अधिकारीलाई उपचारको निम्ति अलीपुरद्वार जिल्ला अस्पतालमा भर्ती गराइएको छ।
परिवार अनुसार, घटनाको समयमा आरोपीका पिता योगेश अधिकारी नजिकैको कोठामा थिए तर उनले कुनै आवाज सुनेनन्। घटनाको पछाड़ीको उद्देश्य हाल स्पष्ट छैन। पुलिसले सही कारण पत्ता लगाउने प्रयास गरिरहेको छ।
हिन्दुस्थान समाचार / भवानी थामी
