गेजिङ, 21 जून (हि.स.)। देशका अन्य भागहरूसँगै गेजिङ जिल्लाले आज क्योङ्सास्थित जिम्नेजियम हलमा स्वस्थ आयुका लागि योग नामक विषयमा १२औं अन्तरराष्ट्रिय योग दिवस २०२६ मनायो।
कार्यक्रम आयुष विभाग, गेजिङले भारत सरकारको युवा मामिला तथा खेलकुद मन्त्रालयको माई भारत र खेलकुद तथा युवा मामिला विभाग, गेजिङको सहकार्यमा आयोजना गरेको थियो, जसको उद्देश्य योग अभ्यास मार्फत शारीरिक, मानसिक र भावनात्मक कल्याणलाई प्रवर्द्धन गर्नु थियो।
कार्यक्रममा गेजिङका जिल्लापाल तेन्जिङ डी. डेन्जोङ्पा प्रमुख अतिथिको रूपमा उपस्थित थिए। आयुष विभागकी योग प्रशिक्षित डा. बिन्ध्या गुरुङले एक व्यापक योग सत्र सञ्चालन गरिन्, जसमा सहभागीहरूले विभिन्न योग आसन, श्वासप्रश्वास अभ्यास (प्राणायाम) र ध्यान प्रविधिहरू प्रदर्शन गरे।
गेजिङका जिल्लापाल डेन्जोङ्पाले अन्तरराष्ट्रिय योग दिवसको अवसरमा सबै सहभागीहरूलाई हार्दिक शुभकामना व्यक्त गरे। उनले शारीरिक तन्दुरुस्ती, मानसिक कल्याण र भावनात्मक लचिलोपनलाई बढावा दिने समग्र अभ्यासको रूपमा योगको महत्त्वलाई जोड दिए। उनले स्वस्थ जीवनशैलीलाई बढावा दिन र जीवनको समग्र गुणस्तर बढाउन योगको महत्त्वपूर्ण भूमिकामाथि प्रकाश पार।
जिल्लापालले योग र अन्य शारीरिक गतिविधिहरूमा नियमित संलग्नताले शारीरिक स्वास्थ्य, मानसिक सतर्कता र व्यक्तिगत अनुशासन कायम राख्न महत्त्वपूर्ण योगदान पुर्याउँछ भनी बताए। उनले सानै उमेरदेखि स्वस्थ बानीहरू अपनाउने महत्त्वमा जोड दिँदै सबै नागरिकहरू, विशेष गरी युवाहरूलाई योगलाई अँगाल्न र स्वस्थ, सन्तुलित र उत्पादक भविष्य निर्माण गर्न नियमित शारीरिक गतिविधिलाई आफ्नो दैनिक दिनचर्यामा समावेश गर्न प्रोत्साहित गरे।
हिन्दुस्थान समाचार / बिशाल
