गान्तोक, 23 जून (हि.स.)। विशेष गहन पुनरीक्षण (एसआईआर) २०२६ अन्तर्गत गान्तोक जिल्लामा गणना फारामको वितरण तथा डिजिटाइजेसन कार्य अन्तिम चरणमा पुगेको छ। जिल्लाभर कार्यरत बुथस्तरीय अधिकारीहरूले निरन्तर रूपमा कार्यलाई तीव्रता दिइरहेका छन्।
आजसम्म जिल्लाले गणना फाराम वितरणतर्फ ९९.६८ प्रतिशत प्रगति हासिल गरेको छ। कुल १,२२,२४० मतदातामध्ये १,२१,८४७ मतदातालाई गणना फाराम वितरण गरिसकिएको छ। त्यसैगरी, डिजिटाइजेसनतर्फ जिल्लाले ८२.८९ प्रतिशत प्रगति हासिल गर्दै हालसम्म १,०१,३३० वटा गणना फाराम प्रणालीमा प्रविष्ट गरिसकेको छ।
बुथस्तरीय अधिकारी तथा निर्वाचन विभागको निरन्तर प्रयासका कारण उक्त प्रगति सम्भव भएको बताइएको छ। उनीहरूले विशेष शिविरहरूको आयोजना तथा सचेतना वाहनमार्फत प्रचार-प्रसार कार्यक्रम सञ्चालन गरी मतदाताहरूलाई पुनरावलोकन प्रक्रियाको महत्त्व र कार्यविधिबारे जानकारी गराइरहेका छन्।
गान्तोक जिल्लामा गणना फारामको वितरण तथा डिजिटाइजेसन कार्य आगामी २८ जून, २०२६ सम्म जारी रहनेछ। गणना फाराम प्राप्त गरिसकेका सम्पूर्ण मतदाताहरूलाई निर्धारित समयभित्र विधिवत् भरिएका फारामहरू सम्बन्धित बुथस्तरीय अधिकारीहरूलाई बुझाउन अनुरोध गरिएको छ।
हिन्दुस्थान समाचार / बिशाल
