गान्तोक, 26 जून (हि.स.)। सिक्किमका राज्यपाल ओम प्रकाश माथुर आज तादोङको ५ माइलस्थित श्री श्री श्री सरस्वती डोल्मा मन्दिरमा आयोजित आध्यात्मिक समारोहमा मुख्य अतिथिका रूपमा सहभागी भए। यस अवसरमा राज्यपालले वैदिक विधि-विधानअनुसार मन्दिर परिसरमा स्थापित द्वादश ज्योतिर्लिङ्ग तथा भगवान शिवको मूर्तिको प्राण प्रतिष्ठा अनुष्ठानमा सहभागिता जनाउँदै यसको अनावरण गरे।
लोक भवनका अनुसार, समारोहमा क्षेत्र विधायक तथा स्वास्थ्य एवं परिवार कल्याण मन्त्री जीटी ढुङ्गेल, मन्दिर व्यवस्थापन समितिका प्रतिनिधिहरू, विभिन्न विभागका अधिकारीहरू तथा ठूलो सङ्ख्यामा स्थानीय श्रद्धालुहरूको उपस्थिति रहेको थियो।
कार्यक्रमको क्रममा आयोजित विशेष सत्रमा राज्यपालले मन्दिरको निर्माण, विकास तथा सेवा कार्यमा निस्वार्थ योगदान पुर्याएका सक्रिय सामाजिक कार्यकर्ता तथा भक्तजनहरूलाई सम्मान गरे। उनी श्रद्धालुहरूसँगै हवनमा सहभागी बन्दै सिक्किमका जनताको सुख, समृद्धि, साम्प्रदायिक सद्भाव तथा उत्तम स्वास्थ्यको कामना गरे।
जनसमुदायलाई सम्बोधन गर्दै राज्यपाल माथुरले भने, “सरस्वती डोल्मा मन्दिरजस्ता धार्मिक संस्थाहरू हाम्रो सांस्कृतिक पहिचान र सामुदायिक एकताको आधारशिला हुन्। मन्दिरको निर्माण तथा विकासमा योगदान पुर्याउने सबै सामाजिक कार्यकर्ताहरूको समर्पणले हाम्रो सांस्कृतिक सम्पदालाई भावी पुस्तासम्म जीवन्त राख्न महत्वपूर्ण भूमिका खेलेको छ।”
उनले भगवान शिव आदि र अनन्त हुनुका साथै कल्याणका देवता रहेको उल्लेख गरे। उनले पवित्र सरस्वती डोल्मा मन्दिरमा भगवान भोलेनाथको प्राण प्रतिष्ठा समारोहको हिस्सा बन्न पाउनु आफ्नो लागि अत्यन्त सौभाग्यको विषय बताए।
सिक्किमका जनताको सादगी, गहिरो सांस्कृतिक आस्था, आपसी सद्भाव तथा वातावरण संरक्षणप्रतिको सचेतनाको प्रशंसा गर्दै राज्यपालले यी गुणहरू सम्पूर्ण देशका लागि प्रेरणादायी रहेको बताए। उनले भगवान शिवसँग सिक्किमका प्रत्येक घरपरिवारमा सुख, शान्ति, समृद्धि तथा उत्तम स्वास्थ्यको आशीर्वाद रहोस् भन्ने प्रार्थना गरे।
---------------
हिन्दुस्थान समाचार / बिशाल
