गान्तोक, 27 जून (हि.स.)। राज्य विज्ञान तथा प्रविधि विभागअन्तर्गत सिक्किम राज्य विज्ञान तथा प्रविधि परिषद्ले राङ्का सरकारी वरिष्ठ माध्यमिक विद्यालयमा २४ देखि २६ जून, २०२६ सम्म सरकारी कर्मचारी, विद्यालय प्रमुख, शिक्षक तथा विद्यार्थीका लागि प्रशासनिक तथा शैक्षिक प्रयोजनमा एआई उपकरण र यसको प्रयोग विषय तीनदिने कार्यशाला सफलतापूर्वक आयोजना गरेको छ।
कार्यक्रममा लगभग १०० जनाले सहभागिता जनाएका थिए।
कार्यक्रमको उद्देश्य प्रशासन र शिक्षाका क्षेत्रमा कृत्रिम बुद्धिमत्ताको प्रभावकारी तथा जिम्मेवार प्रयोगलाई प्रवर्द्धन गर्नु रहेको थियो। विशेष सत्रमा सीबीएसई बोर्ड परीक्षाको तयारीबारे विद्यार्थीहरूलाई एआईलाई स्मार्ट अध्ययन सहयोगीका रूपमा कसरी प्रयोग गर्ने भन्ने विषयमा मार्गदर्शन गरिएको थियो। व्यावहारिक प्रदर्शनमार्फत एआईले अध्ययन योजना तयार गर्न, जटिल विषयवस्तु बुझ्न, पुनरावलोकन नोट तयार गर्न, परीक्षा सम्बन्धी प्रश्नहरूको अभ्यास गर्न, लेखन सीप सुधार गर्न तथा शैक्षिक इमान्दारितालाई कायम राख्दै समग्र शैक्षिक उपलब्धि अभिवृद्धि गर्न कसरी सहयोग पुर्याउँछ भन्ने जानकारी दिइयो।
सहभागीहरूलाई विभिन्न आधुनिक एआई प्लेटफर्महरूबारे जानकारी गराइयो। प्रत्यक्ष प्रदर्शनमार्फत यी उपकरणहरूको पाठ योजना निर्माण, सामग्री तयार गर्ने, प्रस्तुतीकरण विकास, प्रशासनिक कागजात तयार गर्ने, अनुसन्धान, परियोजना तयारी तथा व्यक्तिगत सिकाइमा हुने प्रयोगबारे जानकारी प्रदान गरियो।
कार्यक्रम विज्ञान तथा प्रविधि विभागका प्रधान सचिव डा. सन्दीप ताम्बेको मार्गदर्शनमा सञ्चालन गरिएको थियो। यसको उद्देश्य नियमित सरकारी कार्यसम्पादनमा आधुनिक डिजिटल प्रविधिको समावेशमार्फत प्रशासनिक प्रक्रियालाई आधुनिकीकरण गर्नु, स्मार्ट सुशासनलाई प्रवर्द्धन गर्नु तथा प्रशासक, शिक्षक र विद्यार्थीहरूमा एआई साक्षरताको विकास गर्नु रहेको थियो।
कार्यक्रमका प्राविधिक सत्रहरू सहायक वैज्ञानिक अधिकृत डा. प्रतिवा राईले मुख्य स्रोत व्यक्तिका रूपमा सञ्चालन गरेकी थिइन्। उद्घाटन सत्रमा राङ्का सरकारी वरिष्ठ माध्यमिक विद्यालयका प्रधानाध्यापक आशिष थापा प्रमुख अतिथिका रूपमा उपस्थित थिए। उनले सिक्किममा आधुनिक शिक्षाको बदलिँदो आवश्यकतालाई पूरा गर्न शिक्षक तथा विद्यार्थीलाई उदीयमान डिजिटल प्रविधिसँग सुसज्जित बनाउनु अत्यन्त आवश्यक रहेकोमा जोड दिए।
---------------
हिन्दुस्थान समाचार / बिशाल
