नयाँ दिल्ली, १८ जुलाई (हि.स.)। वातावरणविद् सोनाम वाङ्चुकलाई २० दिनको अनशनपछि स्वास्थ्य अवस्था बिग्रिएपछि शनिबार दिल्लीस्थित सफदरजंग अस्पतालमा भर्ना गरिएको छ। अस्पतालले जनाएको छ, उनको अवस्था हाल स्थिर छ, तर लामो समयसम्मको उपवास र शरीरमा पानीको कमीका कारण उनलाई निरन्तर चिकित्सकीय निगरानी र उपचारको आवश्यकता रहेको छ।

शनिबार सञ्चारमाध्यमलाई जारी गरिएको विज्ञप्तिमा सफदरजंग अस्पतालकी चिकित्सा अधीक्षक डा. चारु बम्बाले बताइन्, “सोनाम वाङ्चुक बिहान करिब ७:४० बजी हाम्रो अस्पताल आइपुगेका हुन्। लामो समयसम्मको उपवासका कारण उनलाई केही कमजोरी महसुस भइरहेको छ र शरीरमा पानीको कमी छ। यसबाहेक उनका सबै महत्त्वपूर्ण स्वास्थ्य सूचकहरू सामान्य र स्थिर छन्। उनको निरन्तर परीक्षण, निगरानी तथा उपचार भइरहेको छ।”

उनले थप बताइन्, वाङ्चुक पूर्ण रूपमा होशमा छन् र उनको अवस्था स्थिर छ। अस्पताल पुगेपछि सबैभन्दा पहिले आपतकालीन चिकित्सा विभागले उनको परीक्षण गरेको थियो, त्यसपछि उनलाई मेडिसिन विभागमा भर्ना गरिएको हो। शरीरमा पानीको कमीका कारण उनका इलेक्ट्रोलाइटहरू (जस्तै सोडियम, पोटासियम आदि) को सन्तुलन प्रभावित भएको छ। चिकित्सकहरूले पहिले त्यसलाई सुधार गर्नेछन् र त्यसपछि उनको अवस्थाको पुनः समीक्षा गर्नेछन्।

हिन्दुस्थान समाचार / भवानी थामी