पाकिम, 29 जुलाई (हि.स.)। रिनाक निर्वाचन क्षेत्र स्वतन्त्रता दिवस समारोह समितिद्वारा आयोजित ८०औँ स्वतन्त्रता दिवस अन्तर-सिक्किम खुल्ला पुरुष निर्वाचन क्षेत्रस्तरीय फुटबल प्रतियोगिता आज मामरिङ सरकारी उच्च माध्यमिक विद्यालयमा भव्य रूपमा शुभारम्भ भयो। उद्घाटन समारोहमा कृषि, बागवानी, पशुपालन तथा पशु चिकित्सा सेवा विभाग मन्त्री पुरण गुरुङ मुख्य अतिथि तथा विधायक पामिन लेप्चा विशिष्ट अतिथिका रूपमा उपस्थित थिए।
समारोहलाई सम्बोधन गर्दै मन्त्री पुरण गुरुङले खेलकुदको प्रवर्द्धन तथा सामुदायिक सहभागिता सुदृढ़ गर्न प्रतियोगिता आयोजना गरेकोमा आयोजक समितिलाई बधाई दिए। उनले राज्य सरकारले कृषि क्षेत्रको विकासका लागि सञ्चालन गरिरहेका विभिन्न पहलहरूको चर्चा गर्दै यस क्षेत्रमा सडक पूर्वाधार सुदृढीकरण तथा समग्र विकासका लागि भइरहेको प्रयासबारे पनि जानकारी गराए।
प्रतियोगिताको पहिलो दिन बिरिङ र पाचेखानीबीच पहिलो खेल सम्पन्न भयो भने दोस्रो खेल मुटान्ची एफसी र भास्मे क्लबबीच खेलाइयो। प्रतियोगिताका विजेताले रु. ३ लाख नगद पुरस्कार प्राप्त गर्नेछ भने उपविजेताले रु. २ लाख नगद पुरस्कार प्राप्त गर्नेछ।
उद्घाटन समारोहमा एसएसबी ६९ बटालियन, तारेथाङद्वारा आकर्षक ब्यान्ड प्रदर्शन प्रस्तुत गरिएको थियो। त्यसपछि पाचेखानी संस्कृत पाठशालाका विद्यार्थीहरूले स्वस्ति वाचन प्रस्तुत गरे भने तित्रीबोटे प्राथमिक विद्यालय र अम्बा माध्यमिक विद्यालयका विद्यार्थीहरूले सांस्कृतिक कार्यक्रमहरू प्रस्तुत गरेका थिए।
---------------
हिन्दुस्थान समाचार / बिशाल
