गान्तोक, 09 जुलाई (हि.स.)। सिक्किम सरकारको महिला, बालबालिका, ज्येष्ठ नागरिक तथा दिव्याङ्गजन कल्याण विभागअन्तर्गत जिल्ला महिला सशक्तीकरण केन्द्रले कोपीबारी ग्राम पञ्चायत एकाईमा दिगो तथा आधुनिक जैविक खेती प्रवर्द्धन विषयक जनचेतनामूलक कार्यक्रम सम्पन्न गरेको छ।
कार्यक्रमको शुरुआतमा लिङ्ग विशेषज्ञ निशा हाङ्मा सुब्बाले मिशन शक्ति अभियानका उद्देश्यहरूबारे जानकारी दिँदै महिलाको सशक्तीकरण तथा कल्याण प्रवर्द्धनमा यसको भूमिकाबारे प्रकाश पारिन्।
प्राविधिक सत्र कृषि विभागका उमेश छेत्रीले सञ्चालन गरेका थिए। उनले सहभागीहरूलाई कृषि क्षेत्रसँग सम्बन्धित विभिन्न सरकारी योजनाबारे जानकारी गराउँदै दिगो तथा आधुनिक जैविक खेती अपनाउँदा जीविकोपार्जनमा सुधार हुनुका साथै पर्यावरणीय दिगोपन कायम गर्न महत्वपूर्ण योगदान पुग्ने बताए।
कार्यक्रममा कोपीबारी जीपीयूकी पञ्चायत अध्यक्ष टिकामाया छेत्री तथा स्थानीय बासिन्दाहरूको उल्लेखनीय सहभागिता रहेको थियो। सहभागीहरूले अन्तरक्रियात्मक छलफलमा सक्रिय रूपमा भाग लिएका थिए।
धन्यवाद ज्ञापनको क्रममा जिल्ला मिशन संयोजक बिरेन गिरीले महिला हेल्पलाइन (१८१), बाल हेल्पलाइन तथा महिला र बालबालिकाका लागि उपलब्ध अन्य सहयोग सेवाबारे पनि जानकारी गराए। साथै, महिला सशक्तीकरण जिल्ला केन्द्रले सरकारी कल्याणकारी योजनामा पहुँच सहज बनाउने, लैङ्गिक समानताको प्रवर्द्धन गर्ने तथा गान्तोक जिल्लाभर महिलालाई सशक्त बनाउने दिशामा निर्वाह गरिरहेको भूमिकाबारे प्रकाश पारे।
हिन्दुस्थान समाचार / बिशाल
