पाकिम, 09 जुलाई (हि.स.)। पाकिम जिल्ला पञ्चायतद्वारा आज वित्तीय वर्ष २०२६-२७ का लागि १६औँ वित्त आयोग (एफसी) अन्तर्गत टेन्टेटिभ रिसोर्स इन्भेलप तथा छैटौँ राज्य वित्त आयोग (एसएफसी) अनुदानको रकम बाँडफाँटसम्बन्धी आन्तरिक बैठक आयोजन गरियो। जिल्ला प्रशासनिक केन्द्र, पाकिमको सम्मेलन हलमा आयोजित उक्त बैठकको अध्यक्षता पाकिम जिल्लाकी जिल्ला पञ्चायतकी अध्यक्ष लाडेन ल्हामु भोटियाले गरेकी थिइन्। बैठकमा जिल्ला उपाध्यक्ष प्रभा प्रधान तथा जिल्लापाल परी बिश्नोई पनि उपस्थित थिए।
बैठकमा पाकिम जिल्लाको जिल्ला पञ्चायतका डीपीओ सोनाम जाङ्पो भोटियाले आर्थिक वर्ष २०२६-२७ का लागि १६औँ वित्त आयोगअन्तर्गतको प्रस्तावित अनुदान वितरणबारे जानकारी गराए। उनले ग्राम पञ्चायत एकाइहरूबीच टाइड र अनटाइड अनुदानको वितरणबारे जानकारी दिँदै टाइड अनुदान खानेपानी तथा सरसफाइसम्बन्धी कार्य, स्वच्छ भारत अभियानअन्तर्गतका गतिविधिहरूमा प्रयोग गरिने र अनटाइड अनुदान विकास निर्माणका साथै ‘नशा मुक्त भारत’ अभियानअन्तर्गतका कार्यक्रमहरूमा खर्च गरिने बताए।
जिल्लापाल परी बिश्नोईले खानेपानी तथा सरसफाई क्षेत्रमा भइरहेका कार्यहरूको प्रगति विवरण माग गर्दै यसको प्रभावकारी कार्यान्वयन सुनिश्चित गर्नुपर्नेमा जोड दिइन्। उनले जिल्ला पञ्चायत सदस्यहरूलाई कुनै पनि विकास कार्य स्वीकृत गर्नुअघि त्यसको गुणस्तरको राम्रोसँग अनुगमन गर्न आग्रह गर्दै विकास योजनाको निगरानीमा उनीहरूको महत्वपूर्ण भूमिका रहेको बताइन्।
उनले सुरक्षित र भरपर्दो खानेपानीको महत्वमा जोड दिँदै सबै नागरिकसम्म प्रभावकारी रूपमा खानेपानी सेवा पुर्याउने सुनिश्चित गर्न आग्रह गरिन् र आवश्यक पर्दा जिल्ला प्रशासनले पूर्ण सहयोग गर्ने प्रतिबद्धता व्यक्त गरिन्। उनले ‘भाइब्रेन्ट भिलेज कार्यक्रम’ अन्तर्गत सञ्चालन भइरहेका विभिन्न विकास आयोजनाबारे पनि जानकारी दिँदै कार्यक्रममा समावेश गाउँहरूको प्रगति विवरण माग गरिन्।
हिन्दुस्थान समाचार / बिशाल
