गान्तोक, 09 जुलाई (हि.स.)। सिटिजन एक्सन पार्टी (सीएपी) सिक्किमको गेजिङ जिल्ला कार्यकारी परिषद्ले आज गेजिङ जिल्ला पार्टी कार्यालयमा जिल्ला कार्यकारी परिषद्को बैठक आयोजन गऱ्यो। पार्टी अध्यक्ष गणेश कुमार राईको उपस्थितिमा आयोजित बैठकमा पार्टीका वरिष्ठ नेतृत्वहरू र सदस्यहरू उपस्थित थिए।
बैठकमा जिल्ला कार्यकारी परिषद्, विधानसभा निर्वाचन क्षेत्र कार्यकारी समितिहरू, एकाई बुथ परिषद् र बुथ स्तरीय एजेन्टहरूबीचको समन्वयलाई बढाएर गेजिङ जिल्लाभरि पार्टीको संगठनात्मक ढाँचालाई सुदृढ पार्ने कुरामा व्यापक छलफल गरियो। यस क्रममा संगठनात्मक विस्तार र चलिरहेको सदस्यता अभियानलाई तीव्र पार्ने, तल्लो तहको संरचनालाई सुदृढ पार्ने र जिल्लाका चारैवटा विधानसभा निर्वाचन क्षेत्रहरूमा पार्टी कार्यक्रमहरूको प्रभावकारी कार्यान्वयन सुनिश्चित गर्ने विषयमा पनि छलफल गरियो।
यसैगरी, विशेष सारांश संसोधन मस्यौदा मतदाता नामावली औपचारिक रूपमा सम्बन्धित विधानसभा निर्वाचन क्षेत्र कार्यकारी परिषद् अध्यक्षहरूलाई हस्तान्तरण गरियो। पार्टी नेतृत्वहरूले मतदाता नामावली संशोधन प्रक्रियाको महत्त्वलाई जोड दिए र सबै पदाधिकारीहरूलाई मतदाता प्रमाणीकरणमा सक्रिय रूपमा संलग्न हुन आग्रह गरे, ताकि प्रत्येक योग्य नागरिकलाई मतदाता नामावलीमा विधिवत रूपमा नामांकन गरिएको सुनिश्चित गर्न सकियोस्।
आफ्नो समापन सम्बोधनमा पार्टी अध्यक्ष गणेश कुमार राईले सबै जिल्लाका नेतृत्वहरू र पार्टी कार्यकर्ताहरूलाई एकता, समर्पण, निष्ठा र संगठनात्मक अनुशासनका साथ काम गरिरहन आह्वान गरे। उनले तृणमूल स्तरमा संगठनलाई बलियो बनाउनुको महत्वमाथि जोड दिॅंदै गेजिङ जिल्लाभरि आगामी संगठनात्मक कार्यक्रमहरूको तयारी गर्दा प्रत्येक पदाधिकारीलाई जनसम्पर्कलाई तीव्र बनाउन आग्रह गरे।
हिन्दुस्थान समाचार / बिशाल
