मुर्शिदाबाद, 22 अगस्त (हि.स.)। एउटा ठूलो कारबाहीमा मुर्शिदाबाद जिल्लाको पुलिसले दुई छुट्टा-छुट्टै पुलिस थाना क्षेत्रमा छापा मारेपछि अवैध हतियार र गोलाबारुदको ठूलो भण्डार जफत गरेको छ। उक्त कारबाहीमा कूल तीन जनालाई पक्राउ गरिएको छ। पुलिस अनुसार, बहरमपुर र शक्तिपुर थाना क्षेत्रमा छापा मार्दा कूल 10 वटा बन्दुक, 11 वटा म्यागजिन र 226 राउन्ड जिउँदो कारतूस जफत भएको छ।
गुप्त सूचनाको आधारमा बहरमपुर पुलिस थानाले पहिलो अपरेशन गरेको थियो। पुलिस हिरासतमा रहेका बहरमपुर शहर युवा तृणमूल काङ्ग्रेसका अध्यक्ष पापाई घोषको घरमा सोधपुछपछि खोजी गरिएको थियो। खोजीको क्रममा घटनास्थलबाट 7 वटा अवैध बन्दुक, 5 वटा म्यागजिन र 186 राउन्ड कारतूस जफत गरियो। सत्ताधारी दलका नेताको घरबाट यति ठूलो मात्रामा हतियार जफत भएको खबरले क्षेत्रमा कोकोहोलो मच्चाएको छ।
सोही समय शक्तिपुर पुलिस थानाले अर्को मुद्दामा एक जना अभियुक्तलाई पक्राउ गरेपछि सोधपुछ गरेको थियो। अभियुक्तबाट प्राप्त सूचनाको आधारमा पुलिसले छापा मारेर 3 वटा बन्दुक, 6 वटा म्यागजिन र 40 राउन्ड कारतूस जफत गरेको छ।
पुलिसले अब हतियारको यस नेटवर्कमा अरू को-को संलग्न छ र यति ठूलो मात्रामा हतियार पठाउने योजना कहाँ थियो भनेर पत्ता लगाउने प्रयास गरिरहेको छ। घटनामा संलग्न रहेको आरोपमा थप दुई जनालाई पक्राउ गरिएको छ।
हिन्दुस्थान समाचार / भवानी थामी
