गेजिङ, 22 अगस्त (हि.स.)। युक्समको नोर्बुगाङमा जारी पाङ ल्हाब सोल महोत्सवअन्तर्गत शनिबारदेखि पाँच साइड फुटसल प्रतियोगिता शुरु भएको छ। प्रतियोगिताको उद्घाटन समारोहमा सरकारी ठेकेदार तथा समाजसेवी जाम्याङ कुङ्गा काजी मुख्य अतिथि र सरकारी ठेकेदार टाशी छोपेल भोटिया विशिष्ट अतिथिका रूपमा उपस्थित थिए।

युक्सममा भइरहेको आठदिने भव्य पाङ ल्हाब सोल महोत्सवको एक भागका रूपमा आयोजना गरिएको फुटसल प्रतियोगितामा कुल ३० टोलीले सहभागिता जनाएका छन्। प्रतियोगिताको पहिलो दिन छवटा खेल सम्पन्न भए।

उद्घाटन खेलमा अपराइजिङ युनाइटेड र भोटिया बोइजबीच प्रतिस्पर्धा भएको थियो। खेल पेनाल्टी सुटआउटमा पुगेपछि भोटिया बोइज विजयी भयो।

कार्यक्रमलाई सम्बोधन गर्दै मुख्य अतिथि जाम्याङ कुङ्गा काजीले युक्समलाई पवित्र तथा सौभाग्यशाली भूमि बताउँदै समृद्ध सांस्कृतिक महोत्सवलाई भव्य रूपमा आयोजना गर्ने समितिको पहलको प्रशंसा गरे।

उनले युक्सममा पर्यटनको अपार सम्भावना रहेको उल्लेख गर्दै पाङ ल्हाब सोल जस्ता महोत्सवले युक्समलाई सांस्कृतिक तथा पर्यटन गन्तव्यका रूपमा प्रवर्द्धन गर्न महत्वपूर्ण भूमिका खेल्न सक्ने बताए। साथै, सिक्किमका विभिन्न समुदायबीच एकता र सामाजिक सद्भाव कायम राख्नुको महत्त्वमा जोड दिँदै उनले ‘विविधतामा एकता’ को भावना सुदृढ गर्न आह्वान गरे।

कार्यक्रममा विद्यार्थी तथा स्थानीय सांस्कृतिक समूहहरूले प्रस्तुत गरेका सांस्कृतिक कार्यक्रमले थप रौनक थपेको थियो।

उल्लेख्य, पाङ ल्हाब सोल महोत्सव आयोजना समिति, युक्समले क्षेत्र विधायक तथा मन्त्री छिरिङ टी. भोटियाको संरक्षणमा महोत्सव आयोजना गरिरहेको छ। महोत्सवलाई वन तथा वातावरण विभागअन्तर्गत खाङ्चेनजोङ्गा राष्ट्रिय निकुञ्ज डिभिजन तथा सिक्किम सरकारको पर्यटन तथा नागरिक उड्डयन विभागले सहयोग गरेका छन्।

हिन्दुस्थान समाचार / बिशाल