काठमाडौं, २९ अगस्त (हि.स.)। नेपालमा भोटेकोशी नदीमा आएको बाढीका कारण रसुवा जिल्लाका विभिन्न जलविद्युत् परियोजनाका सुरुङमा फसेका कर्मचारीलाई उद्धार गर्न भारतले विशेष प्राविधिक टोली नेपाल पठाएको छ। टोलीसँगै उद्धारका लागि आवश्यक प्राविधिक उपकरण तथा करिब १० टन राहत सामग्री पनि नेपाल आइपुगेको छ।
भारतबाट पठाइएको प्राविधिक टोली र सामग्री काठमाडौं पुगेपछि भारतीय दूतावासले नेपाल सरकारलाई हस्तान्तरण गरेको छ। नेपाल सरकारको आग्रहमा भारतले उद्धार कार्यमा प्राविधिक सहयोग पुर्याउन विशेषज्ञ टोली र आवश्यक उपकरण पठाएको हो।
भोटेकोशी नदीमा आएको भीषण बाढीपछि रसुवाका विभिन्न स्थानमा रहेका जलविद्युत् आयोजनाका सुरुङभित्र फसेका कर्मचारीसम्म पुगेर उनीहरूलाई सुरक्षित बाहिर निकाल्न उद्धार टोलीलाई कठिनाई भइरहेको छ। परिस्थितिलाई ध्यानमा राख्दै नेपालले भारतसँग प्राविधिक सहयोग मागेको थियो।
भारतबाट आएको टोलीसँग सुरुङभित्र उद्धार अभियान सञ्चालन गर्न आवश्यक प्राविधिक विशेषज्ञता र उपकरणहरू रहेका छन्। साथै, बाढी प्रभावित क्षेत्रका लागि करिब १० टन राहत सामग्री पनि नेपाल पठाइएको छ। उक्त सामग्री प्रभावित क्षेत्रमा जारी राहत कार्यमा प्रयोग गरिनेछ।
यसअघि पनि भारतले दुईपटक राहत सामग्रीसहितका विमान नेपाल पठाइसकेको छ। भारतबाट हालसम्म कुल ५७.५ टन राहत सामग्री नेपाल पुगिसकेको जनाइएको छ।
भारतले निरन्तर उपलब्ध गराउँदै आएको राहत सामग्री र प्राविधिक सहयोगबाट बाढी प्रभावित क्षेत्रमा राहत तथा उद्धार कार्यलाई तीव्रता दिने र संकटमा फसेका व्यक्तिसम्म आवश्यक सहयोग पुर्याउने उद्देश्य राखिएको छ।
हिन्दुस्थान समाचार / बिशाल
