नयाँ दिल्ली, १३ सेप्टेम्बर (हि.स.)। राष्ट्रिय मानवअधिकार आयोग (एनएचआरसी) ले विदेश मन्त्रालयको सहयोगमा ग्लोबल साउथका राष्ट्रिय मानवअधिकार संस्थान (एनएचआरआई) का वरिष्ठ अधिकारीहरूका लागि छ दिने विशेष क्षमता अभिवृद्धि कार्यक्रम आयोजना गर्ने भएको छ। भारतीय प्राविधिक तथा आर्थिक सहयोग (आईटीईसी) कार्यक्रमअन्तर्गत आयोजना हुने यो कार्यकारी कार्यक्रम १४ देखि १९ सेप्टेम्बरसम्म नयाँ दिल्लीमा सञ्चालन हुनेछ। एनएचआरसीका अध्यक्ष न्यायमूर्ति वी. रामसुब्रमण्यमले सोमबार कार्यक्रमको औपचारिक उद्घाटन गर्नेछन्।

एनएचआरसीका अनुसार, यस छ दिने कार्यक्रमको मुख्य उद्देश्य सहभागी देशका मानवअधिकार संस्थाहरूको कार्यक्षमता सुदृढ़ गर्नुका साथै मानवअधिकारको संरक्षण तथा प्रवर्द्धनका लागि उत्कृष्ट अभ्यास र अनुभवहरूबीच पारस्परिक आदानप्रदान गर्नु हो। आयोगले यसअघि आयोजना गरेका चारवटा आईटीईसी क्षमता अभिवृद्धि कार्यक्रमबाट प्राप्त प्रतिक्रिया तथा सहभागी संस्थाहरूको आवश्यकतालाई ध्यानमा राखेर विशेष पाठ्यक्रम तयार गरिएको हो। कार्यक्रममा १५ देशका राष्ट्रिय मानवअधिकार संस्थानबाट ४१ जना वरिष्ठ अधिकारी सहभागी हुँदैछन्।

प्रशिक्षण सत्रमा अन्तरराष्ट्रिय मानवअधिकार संरचनाको विकास, समसामयिक मानवअधिकार चुनौती, मानवअधिकार तथा व्यापार, नयाँ प्रविधिको प्रभाव र दिगो विकासजस्ता महत्वपूर्ण विषयमा गहन छलफल हुनेछ। यसका साथै विश्वव्यापी मानवअधिकारको परिप्रेक्ष्यमा एनएचआरसीको कार्यप्रणाली, उजुरी व्यवस्थापन प्रणाली तथा अनुसन्धान संयन्त्रबारे व्यावहारिक जानकारी पनि विदेशी प्रतिनिधिहरूसँग साझा गरिनेछ।

तीन दशकभन्दा बढीको समृद्ध संस्थागत अनुभवका आधारमा एनएचआरसीले ग्लोबल साउथका देशहरूमा मानवअधिकारको वकालत, कानुनको प्रभावकारी कार्यान्वयन तथा संस्थागत सुदृढीकरणका लागि सहकार्यलाई प्रोत्साहन गर्नेछ। कार्यक्रममा सम्बन्धित विषयका विशेषज्ञहरूले स्रोत व्यक्तिका रूपमा मार्गदर्शन गर्नेछन्। व्याख्यानका अतिरिक्त सहभागी अधिकारीहरूका लागि व्यावहारिक संवाद सत्र, सांस्कृतिक आदानप्रदान तथा स्थलगत भ्रमणको समेत व्यवस्था गरिएको छ।

/ बिशाल